Sarawak agi nitihka SOP Renggat 3 PPN

KUCHING: Sarawak agi nitihka Atur Pengawa Standard (SOP) ti udah bisi nyentukka SOP Renggat 3 Pelin Ngemanahka Menua (PPN) ungkup nengeri Sarawak dipadahka baru nangkan ke tu.

Komiti Penyangga Penusah Nengeri (JPBN) dalam siti penerang media madahka, komiti tu udah nemu pasal gerah ti dipadahka Menteri Besai Tan Sri Muhyiddin Yassin kena 8 Ogos tu tadi pasal atur ti ditendurka ngagai orang ti udah genap nerima dua dos vaksin Covid-19.

Ku penerang nya, Sarawak mega endang bisi berundingka pemaik pengudah rayat genap nerima vaksin enggau nerima manah semua servis ti dipadahka bekaul pengerai runding enggau fizikal rayat nyengkaum aktiviti ekonomi menua.

Nya alai, pejalai SOP ngagai orang ti udah genap divaksin deka dikena pengudah SOP ti diperambu disetuju JPBN laban komiti nya deka ngulihka lalau ari raban bepenau pengerai dulu.

Ensana Muhyiddin dalam Pesan Khas iya madahka atur ditendur ngagai orang ti udah genap nerima vaksin Covid-19 nyengkaum pengawa neresa pelilih menua enggau nengeri.

Sentang pekera bukai penereng tu madahka, Sarawak ngerikodka 589 kes positif baru Covid-19 enggau tiga kes pemati baru sehari tu.

Kes positif baru tu dirikodka ba Pelilih Menua Kuching (348), Mukah (70), Saratok (32), Samarahan (24), Kabong (20), Bau (19) enggau ke bukai.

Nya ngujungka kes positif Covid-19 di menua tu nambah 81,917 kes.

Ku penerang nya, ari 589 kes baru ti dirikodka tu, 108 bisi nunjukka kelai dirampit Covid-19 lebuh beperesa ke alai 390 iku ditemu ari orang ti kala ngembuan kaul rat enggau orang ti kala positif Covid-19 sebedau tu.

Ngelansa kes pemati baru, penerang tu madahka sida ti midang tu iya nya dua iku lelaki enggau siku indu ke beumur entara 56 ngagai 85 taun.
Sida tu mega dirikodka ba Sepital Sri Aman enggau Sepital Besai Sarawak.

Nya ngujungka penyampau kes pemati di Sarawak nambah ngagai 471 iku.

Kelimpah ari nya, penerang tu mega madahka Sarawak ngerikodka empat kluster iya nya Kluster Taman Yen Yen, Kluster Crown Mas, Kluster Lorong Teruntum di Kuching enggau Kluster Jalan Pisang Raja di Bintulu.

Tandu penerang nya agi, Pelilih Menua Betong bebali ngagai status kuning ari oren kemari pengudah ngerikodka 19 kes dalam timpuh 14 hari ke udah lalu.

Suara Sarawak