Servis bank chukup beguna ba menua pesisir

SEBUYAU: Sukung ari rayat beguna amat dikena nentuka mayuh agi endur ba menua pesisir disediaka servis bank.

Menteri Pemansang Pedagang enggau Gerempung Kerejasama, Datuk Seri Dr Wan Junaidi Tuanku Jaafar madah, enti nadai sukung ari rayat tentu pengawa numbuhka bank ba menua pesisir nyadi tusah.

“Kami pedis deka nyendiaka servis bantu enti sema nadai siku rayat muka akaun ba bank nya,” terang iya.

Wan Junaidi mansutka jaku nya ba aum pemberita pengudah bejadika pengawa muka pampang baru Rakyat Xcess enggau Ar-Rahnu X’Change, ditu sehari tu tadi.

Ku iya, perambu nyendiaka servis bank ba menua pesisir udah dikerandau Perintah Sarawak begulai enggau Bank Negara Malaysia (BNM).

“Nya alai, aku minta Bank Rakyat beratika baru endur ke patut nyendiaka servis tu ba selampur menua lalu ukai semina ba Sarawak aja.

“Tang, beduduk ari Sarawak enggau Sabah ba ngembuan mayuh endur ba entigis, nya kebuah Sarawak dikenulu ngambi kami ulih nyendiaka servis bank ngagai menua pesisir,” ku iya nerang.

Ku Wan Junaidi, ambika banding ba Sungai Asap ngembuan mayuh rayat kelebih agi ba kem batang besemak dia.

“Nitihka penerang, urung 15,00 peranak kem batang ke bisi belanja enggau ulih disimpan dalam bank.

“Insiiatif tu nentuka servis ulih dikerembai ngagai kandang menua ulu,” ku iya nerang baru.

Wan Junaidi madah, iya udah berandau enggau Kepala Menteri Datuk Patinggi Abang Johari Tun Openg pasal servis bank ba menua pesisir lalu pekara tu nerima timbal ke chukup manah.

“Aku mega udah berandau enggau Sapit Kepala Menteri Datuk Amar Douglas Uggah Embas lalu iya deka nyaup ngemuntangka pengawa nyendiaka sambung Wifi ngena satelit.

“Reti iya, enggau pemisi sambung satelit tu, servis bank ulih ngena sambung Wifi, Internet enggau ke bukai,” terang iya.

Wan Junaidi ngarapka ba timpuh tiga ngagai lima taun agi, kandang menua pesiisr deka bisi servis bank.

Suara Sarawak