Tangu leka pelaga narit ati pengajar UK

KUCHING: Siku pengajar ari menua United Kingdom (UK) tekait ati meda pemanah tangu leka pelaga ditusuk Frankey Fiq.

Iya madahka pengajar ari UK nya sanggup datai ngusung sida lebuh ngulu Bengkel Penempa Sugu Tinggi Iban enggau Tangu Renggat Kedua.

“Bengkel empat hari berunggu nya diatur ba Rumah Panjai Sibut, Mukim Amo, Pelilih Temburong, Brunei Darussalam, berengkah ari 17 ngagai 20 Januari 2019.

“Pengajar ari UK nya ngajar ba menua Brunei ditu lalu iya tekait ati meda pemanah bungai tangu ditusuk ngena leka pelaga biru,” ku iya lebuh ngepunka randau begulai enggau Suara Sarawak.

Pemenang lumur tiga Pekit Tangu Online 2021 apin lama nya madah, tangu leka pelaga mega kala dibeli peranak ari Indonesia enggau Brunei.

BEKUNSI PENEMU… Gambar kenang Frankey enggau Louis Wesly lebuh ngatur Bengkel Penempa Sugu Tinggi Iban enggau Tangu Renggat Kedua di Rumah Panjai Sibut, Mukim Amo, Pelilih Temburong, Menua Brunei Darussalam taun 2019.

Nya alai iya chukup temegah ati laban tangu leka pelaga udah narit ati bala akim lalu dua iku penguna ngudar tangu ke sebaka ari iya pengudah dipadu bulih lumur dua ba pekit nya.

Frankey madah, pekit online baka tu chukup manah ngambi mayuh orang meda pemanah keranjai jari bala pedagang kraf sereta ulih meda keranjai jari bala bukai baka tangu tu.

Peranak ari menua Brunei nya endang suah bebelika rengka ngepan Iban lalu siku peranak Indonesia ti kala meli tangu nya bakih sama gawa enggau iya suba.

“Sida rindu meda pemanah bungai enggau leka pelaga ke udah ditusuk aku nyadi tangu nya.

“Naka diatu, lebih ari tujuh iti tangu leka pelaga aku udah dibeli orang tang kenang lebuh pengajar ari UK ke meli tangu leka pelaga biru nya meruan dikeingat laban enda nyangka keranjai jari aku tau ngasuh iya tekait ati lalu meli tangu nya.

“Aku enggau sifu Louis Wesly suah ngatur kus ba Brunei lalu aku mega entara pengajar ke ngajar sentang chara ngaga tangu tu.

“Chukup gaga ati nerima timbal ari mensia mayuh di Brunei ke udah datai ngulu kus ngaga tangu lebuh nya.

“Tambah mega, ba pengawa nya kami udah dirandau stesyen televisyen ba Brunei.

“Lebuh nya, temegah ati laban pengawa kami tu nerima sukung penghulu enggau tuai bansa dia kelimpah ari bala penyereta,” ku Frankey ngepunka randau enggau Suara Sarawak.

NARIT ATI… Sugu tinggi ditengkebang Frankey.

ANGKUNKA KERESA LAMA

Peranak asal Mapai, Kanowit tu madah, iya terubah belajar ngaga tangu ari ibu iya empu, Gerita Liau.

Frankey madahka iya nadai kala masuk kus tauka bengkel ngaga tangu lalu diatu aja iya bisi dibai ngajar ngaga tangu.

“Terubah belajar suba, aku sigi bedau nemu ngaga bungai ke mar lalu aku bisi tepedaka siti gambar tangu lama ditusuk ngena leka pelaga ba Google.

“Dia aku rindu amat meda tangu leka pelaga nya lalu nguji nunda bungai tangu ke dipeda ba Google nya laban aku tekait ati meda leka pelaga taja pen leka pelaga nya mar rega ari leka manik bukai.

“Taja pia, gambar ke dipeda aku ba Google nya ukai ngena leka pelaga lalu aku empu ke nambah ngena leka pelaga laban dekaka manik lama kitai diangkatka baru.

“Aku belajar enggau nyual keresa ba ngepan kitai Iban endang ari ati ke rinduka keresa lama kelebih agi tangu tu.

“Munyi ku dipadah aku tadi, ibu aku ke ngajar ngaga diatu laban nyentuk diatu pen iya agi ngaga tangu enggau produk kraf jari bukai ari leka manik.

“Kira aku nampung pengelandik iya lalu ari ati ke sigi keran deka ngetan enggau ngangkatka keresa asal kitai Iban,” ku Frankey nusi.

Iya mega madahka diri bisi belajar ngaga sugu tinggi ari Louis Wesly, belajar beranyam tikai ba Mandak Chagik lalu iya mega bisi ngaga kain burie.

BEMACHAM PENGELANDIK

GAYA BARU… Tangu digaga Frankey ngena leka pelaga biru.

Kelimpah ari tangu, Frankey mega bisi ngaga produk kraf bukai baka sugu tinggi, selampai manik, Ngepan Batang Rajang Baju Ujan, selampai sulam enggau beranyam tikai.

“Gaya dagang aku ngelama tu ngemantupka ati laban aku ukai semina ngaga tangu aja tang produk kraf bukai.

“Bai ati rinduka kraf asal kitai Iban, dia aku belajar ngaga mayuh produk kraf baka sugu tinggi, selampai manik, Ngepan Batang Rajang Baju Ujan enggau ke bukai.

“Lebuh ke nadai pengawa tauka mindah ke bukai, sigi dulu nyingkau leka manik lalu berengkah begagaka tangu enggau produk bukai.

“Maya Atur Mindah Betagang (PKP) tu, aku berengkah beranyam tikai ngena tali dangat tauka diatu mayuh orang nyebut nya tali kutak kala ke kemisi enggau nadai ulih mindah ke bukai.

“Puji Tuhan, tikai dianyam aku tu nerima mayuh peminta,” ku Frankey nerang baru.

Ngelansa pasal pengawa ngaga tangu, Frankey madahka tangu dianjung iya bepekit empai lama nya enda mar digaga.

Ku iya, bungai tangu dianjung bepekit nya sigi bungai tangu lama segi tiga ke alai iya nusuk tangu nya ngena leka pelaga kacha sebaka enggau leka pelaga lama kelia.

“Aku nembuka tangu nya pengelama empat hari aja lalu chunto bungai tangu ba Google tadi mega tangu leka pelaga keterubah digaga aku,” ku iya nerang silik.

MANAH… Dunjung manik digaga Frankey.

MAYUH PENGELEBIH

Lebuh ditanya pasal pengelebih teknologi baru, dia Frankey, 33 taun madah, teknologi baru tu ngembuan mayuh pengelebih ngagai pedagang kraf kelebih agi maya pandemik tu.

Ku iya, teknologi baru baka media rama tu udah meri peluang baru ngagai sida nambahka penatai pemisi lebuh ngelakuka keranjai jari sebelah Facebook, Instagram enggau ke bukai.

Frankey madahka media rama nya nyadi lubuk jereki sida laban diatu enda mindah ngajar orang baka selama ketegal pengerekai igi penyakit Covid-19.

“Chukup manah teknologi digital baka media rama tu nyaup kami, pedagang kraf beretan betapi pandemik Covid-19 ketegal enda ulih mindah bejual baka selama.

“Tambah mega, media rama tu muntang agi endur kami ngelakuka produk kraf laban ulih dipeda mensia mayuh.

“Kebuah pia laban semua orang bisi akaun media rama baka Facebook, Instagram enggau ke bukai endur sida meda bemacham produk kraf dijual di menua tu.

“Kelimpah ari nya, kami duai bakih aku, Alvina Enap mega bisi numbuhka siti Facebook Group RABAN KERANJAI MANIK.

“Ba dia, kami bekunsika semua produk manik lalu sida ke baru belajar mega bela diembing ngambi bulih penemu baru dalam group nya.

“Rindu amat meda kaul kami dalam Facebook Group nya lebuh sama bekunsika penemu, sama ngajar pangan diri sereta mantaika keranjai jari diri.

“Ba dalam Facebook Group nya kami ukai semina belajar enggau bekunsika penemu aja tang ngena pelasar nya bejualka keranjai jari enggau rega ke patut,” ku Frankey.

KERESA LAMA… Tangu tu entara keresa lama dalam ngepan Iban ke patut dijaga manah.

ENDA RANGKA PENEMU

Berebak enggau nya, sebedau pandemik tu Frankey suah belajar enggau Louis Wesly ngatur bengkel pasal pengelandik asal tu datai di menua Brunei.

Tu nyengkaum Bengkel Penempa Sugu Tinggi Iban enggau Tangu Renggat Kedua, Bengkel Selampai Cross Stitch sereta Bengkel Simpai enggau Tumpa di Rumah Panjai Sibut, Mukim Amo, Pelilih Temburong, Menua Brunei Darussalam.

Nya alai, barang sapa ke deka meli produk kraf dijual Frankey, kita tau ngelawa Facebook iya, Frankey Fiq tauka Whatsapp nuju lumur, 0145995886.

“Nampung baru randau tadi, nyadi aku diatu ngetu dulu ngaga tangu laban nyau kiruh beranyam sereta berumban deka nembuka udar ari bala penguna.

“Dalam sebulan, aku ulih nganyam tiga iti tikai lalu rega siti tikai nya bepanggai ngagai gaya ukir enggau chura iya.

“Enti chura enggau ukir nya manah, mar agi ga rega iya. Untung ari pengawa beranyam enggau nyual produk kraf ngelama tu bisi amat ke belanja enggau mulaika puku dikena meli baru kereban diguna.

“Pandemik Covid-19 tu udah ngeruga pejalai aku laban ngelama tu suah bedagangka produk kraf tu ngagai menua bukai.

“Diatu nyau bepanggai ngagai dagang online aja, nyau pandak singkang ketegal pengerekai igi penyakit Covid-19 tu.

“Arapka pandemik tu jampat pukas ngambi ulih bedagang ngagai menua bukai baka selama lalu kitai nadai penangi ngereja pengawa baka ngelama tu,” ku Frankey mantaika sebana.

LEKA MANIK LAMA… Frankey rindu ngaga tangu ngena leka pelaga taja leka manik nya mar rega.

JULUK ATI

Ba pengujung randau, dia Frankey ngembuan juluk ati dekaka bansa bukai ngelala ngepan kitai ukai semina ba menua tu aja tang ulih dikelala ba mata dunya.

Ku iya, pengawa ngangkatka ngepan enggau keresa asal kitai beguna amat sereta besai reti ngambi peranak ari menua bukai ulih meretika adat enggau ngepan kitai.

“Nuju bala pedagang kraf bukai, anang ngetu enggau anang mantul ngapa ba pengawa ngaga produk kraf lalu besaup meh kitai ngangkatka keranjai jari bansa kitai.

“Ari produk kraf tu mega kitai ulih narit ati orang bukai rinduka menua kitai, Tanah Kenyalang tu ke chukup pegari nama diuan pupu bansa enggau bemacham pengeraja asal.

“Pengelandik asal dikembuan kitai tu mega patut ditampung ngagai rebak biak ngambi enda lesap diserunyut arus pemansang dunya.

“Pesan aku nuju rebak biak, anang enggai belajarka pengelandik asal ke ditampung ari aki ini kitai kelia laban tu mandangka identiti bansa kitai,” ku jaku pesan Frankey.

NGEPAN BATANG RAJANG BAJU UJAN

 

LANDIK BERANYAM… Frankey ukai semina landik betusukka leka manik tang landik beranyam tikai.

 

ANGKUN… Frankey keran deka ngangkatka produk asal kitai ngambi dikelala ba mata dunya sereta suah bekunsika penemu datai ba menua Brunei.
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak