Tiey Beredai mantaika pengingat maya besulu nengah lagu Semampai Ngenang Nuan

Tiey Beredai,siku penanyi bajik dibaruh perabung T&S Recording Home Studio sekali agi datai ngerichahka industri lagu Iban nengah sebuah lagu berentak Balada dikumbai Semampai Ngenang Nuan.

Kenu ku Berebadai, lagu tu nyeritaka pengerindu rumbau entara siku bujang enggau dara sereta bechuanka pekara ti kala nyadi ba dunya nyata. empu.

“Semua pekara ti kala nyadi dalam pengidup aku sekumbang madu pengerindu ditusika aku magang nengah lagu Semampai Ngenang Nuan tu.

“Pelaba aku jarang penanyi bukai sanggup nyerita lalu bekunsika kisah dalam pengidup diri enggau peminat sereta orang bukai baka tu.

“Tang nya mih pekara ke ditapi tudah diri lalu genap genap penanyi endang ngembuan chara ti bebida. Nya alai, arapka kenang dalam lagu aku nya ulih nyadi lalau ngagai raban bujang dara ke benung nanggam pengerindu,” ku iya madah ngagai Ruai, Suara Sarawak.

Tiey Beredai

Nangkan ke nya, Beredai madah lagu tu enti nitih patut tembu ba taun nyin kemari tang nyau tejanggal ketegal pengerekai pandemik Covid-19.

Nya alai, nuju bala peminat ti apin ninga lagu tu kita ulih meda ba Channel Youtube Tiey Beredai empu tauka Channel Youtube Panggau Buluh Pengerindu (PBP) ti diempu penanyi tebilang Embat Lala.

“Enti kita deka nemu baka ni kisah tauka cherita pengidup aku, dinga mih lagu Semampai Ngenang Nuan tu. Taja pia, arapka mensia mayu enda
salah peragam lalu pajak ke mih nyukung lagu-lagu ke udah dikeluarka bala kami.

“Aku nemu mayuh peminat udah lama nganti lagu baru ari aku kenyau ari pun taun nyin kemari, tang nadai ku enggau laban penusah datai nuntung menua ngujungka pengawa ngerakam lagu tu nyau tejanggal,”ku iya.

Berebak enggau nya, Beredai mega madah diri deka mansutka siti agi lagu baru dikumbai Semina Tinggal Kenang.

“Meri besai terima kasih ngagai raban tim T&S Recording Home Studio enggau bala bukai ke udah bebendar nyaup ngemujurka lagu tu.

“Sayau ukai reti iya mesti ngempu, taja enda mujur nyapai juluk deka segulai sejalai saum tangkai ukai ngujungka kitai enggai bepeda tang endang udah atur Petara, nadai sapa ulih ngubah iya,”ku jaku sebana iya.

Ungkup penemu, Beredai sebedau tu kala ngeluarka Album Kompilasi Gawai taun 2020 dikumbai Betabi Jari Maya Gawai.

Tiey Beredai

 

PENGERINDU RUMBAU…Beredai melakunka kenang pengidup iya empu enggau Brandany Bryan nengah lagu Semampai Ngenang Nuan.

Suara Sarawak