11 pintu sida ke tebabak atap di Kpg Sg Dua, Baram dibantu

MIRI: Sepenyampau 11 iku sida ti napi penusah tebabak atap laban kabut sebulan ke udah lalu ba Kampung Sungai Dua, Baram nerima bantu barang nyeruri kemari.

Pengawa nyuaka bantu nya dikemujurka Adun Telang Usan Dennis Ngau ba Padang Waterfront Long Lama.

Dulu ari nya, dalam jaku iya, Dennis meri terima kasih ngagai perintah enggau Opis Pengintung Pengelantang Mensia Mayuh (JKM) laban jampat mantu peranak ti napi penusah ketegal kabut nya.

“Sepenyampau 11 iku peranak kampung nya napi penusah jai atap rumah laban kabut.

“Bantu mata duit ti diberi JKM sehari tu (kemari) deka dikena sida meli atap baru,” ku iya.

Dennis madahka, taja pan bantu nya mimit ari rega ungkus kebendar nyeruri rumah tang perintah enggau naka ulih deka mantu ngelempungka tating penanggul sida.

Dennis enggau Kaban Parlimen Miri Anyi Ngau madahka deka nambah penyampau nya beungkus RM1,000 ngagai genap pintu rumah nya enda lama agi.

Berebak enggau nya, JKM madahka bantu ti diberi nya enda sama penyampau bepanggai ngagai tikas pansik rumah ti dipejalaika pemesai maya datai ngesah penusah nya sebedau tu.

JKM mega ngarapka raban ruang bilik tu ngena bantu ti diberi perintah enggau manah iya nya ungkup meli barang nyeruri rumah lalu ukai dikena meli barang bukai.

Nangkan nya, program tu kemari bejalai enggau manah ke alai semina penerima bantu aja diasuh datai sereta nitihka Atur Pengawa Standard (SOP) ti ditetapka perintah.

Suara Sarawak