90 peratus pengereja pengawa Indonesia di Sarawak udah divaksin

SIBU: Urung 90 peratus pengereja ari menua Indonesia iya ke gawa ba Sarawak udah nerima vaksin, ku Konsulat Jenderal Republik Indonesia di Kuching, Yonny Tri Prayitno.

Iya madahka pekara nya ngagai pemberita lebuh ngatur pejalai nemuai meri basa ngagai Tuai Polis Pelilih Sibu ACP Stanley Jonathan Ringgit ba Indu Opis Polis Pelilih (IPD) Sibu, ditu kemari.

Yonny madah, tebal agi pengereja ke gawa ba sektor ladang udah nerima vaksin ari pengaji sida.

“Nitihka penerang, pengaji ke ngambi rayat kami gawa ba ladang sida udah nerima vaksin ari opis pengerai ba menua tu.

“Semua sida udah nerima vaksin tang sida ke gawa ba kedai tauka ke bukai nya enda ga aku nemu laban penerang sida nadai direjister ngagai opis kami nengah pengaji sida,” terang Yonny.

Ku iya, pengaji ari serikat besai baka sektor kilang enggau ladang nya udah rejister pengereja nya udah direjister ngagai opis sida.

“Nya meh penerang diterima kami ke alai urung 90 peratus pengereja kami udah nerima vaksin laban bisi rikod,” ku iya.

Beduduk ari nya, iya ngandalka 100 peratus rayat Indonesia ke gawa ditu nerima vaksin kelebih agi sida ke diau ba menua jauh enggau begunaka staf Opis Menteri Pengerai Malaysia (KKM) datai meri sida vaksin.

Ngelansa pasal randau enggau Stanley, Yonny madah seduai udah berandauka inisiatif nentuka rayat Indonesia ke gawa kelebih agi ba Sibu nemu pasal pengerekai Covid-19 enggau nitihka Atur Pengawa Standard (SOP).

Ku Yonny, sida begunaka bantu polis ngambi nerang pasal Covid-19 ngambi pengereja ari menua iya disiplin enggau semampai nitihka SOP.

Yonny madahka ba randau nya, iya berundingka inisiatif enggau peluang baka ni polis ditu enggau polis Indonesia ulih bekerejasama mukaska pengerekai Covid-19 entara pengereja enggau komuniti.

Nitihka penerang, iya madahka sebedau pandemik tu urung 140,000 peranak Indonesia dirikodka gawa ba Sarawak.

Ku Yonny madah baru, ari penyampau nya, bisi 47,000 iku udah pulai ke menua asal ba taun 2020 lalu 28,000 iku agi ba taun tu.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak