Agenda Bumiputera deka terus ditegap Perintah Besai

KUCHING: Perintah Besai deka ngedut agi takah penatai pemisi entara raban Bumiputera enggau bansa bukai di menua tu.

Menteri Besai Datuk Seri Ismail Sabri Yaakub madahka perintah sedar sekeda raban Bumiputera agi ngembuan penatai pemisi mimit enggau seranta enti dibanding bansa bukai.

“Aku deka meri jamin ngagai agenda Bumiputera deka terus ditegapka enggau enda ditinggalka nitihka Pekara 153 Konstitusyen Perintah Besai ti meri hak enggau pengelebih ngagai orang Melayu enggau anak asal nengeri Sabah enggau Sarawak nyengkaum hak bansa bukai ti sah,” ku iya.

Iya bejaku munyi nya lebuh Mantaika RMK12 2021-2025 di Kuala Lumpur kemari.

Ku iya, Keluarga Malaysia mungkur rayat Bumiputera, Orang Asli enggau anak asal nengeri Sabah ti ngembuan 42 etnik enggau lebih 200 sub-etnik baka bansa Kadazan, Dusun, Murut, Rungus enggau Bajau.

“Baka nya mega Bumiputera Sarawak ti ngembuan 27 etnik baka bansa Iban, Orang Ulu, Melanau enggau Bidayuh kelimpah bansa China, India enggau ke bukai.

“Perintah andalka ulih nyapai pemansang sosioekonomi ti adil enggau inklusif seriris enggau semangat Keluarga Malaysia,” ku iya.

Ku iya, entara pekara deka diatur perintah iya nya nyendiaka latih dalam bidang teknikal enggau profesional.

“Ungkup nambahka penatai pemisi Bumiputera, pelasar enggau pejalai kouta pengempu rumah ngagai raban Bumiputera deka ditegapka nengah kerejasama rat entara Perintah Besai, perintah nengeri enggau kaunsil kandang menua,” ku iya.

Suara Sarawak