Anang guai mai anak ngulu palan mensia mayuh

BINTULU: Apai indai ditangkan anang guai mai anak sida ke bedau dituchuk vaksin nya ngagai palan mensia mayuh dikena nyaga sida ari kena rampit igi penyakit Covid-19, ku Kaban Parlimen Bintulu Datuk Sri Tiong King Sing.

Ku iya, berapa hari tu iya suah meda apai indai mai anak sida bejalai di Bintulu.

“Bisi sekeda ninggalka anak sida dalam entukar lebuh bebelika barang.

“Semua pekara tu tau ngasuh anak sida mudah kena rampit lalu diatu anang mai anak kitai raun.
Ku iya, apai indai mesti nemu diatu sida patut nyaga anak maya pandemik tu,” ku iya nerang seraya irauka kes Covid-19 ngerampit anak mit ba menua tu majak nambah.

Ku iya, 24 ari 56 kes Covid-19 diirikodka ba Bintulu kena Hari Sat utu tadi ngaul nembiak beumur entara empat enggau 16 taun.

“Beduduk ari varian baru, aku ngarapka peranak ba mengeri nyengkaum di rumah panjai enggau genturung pendiau matau pejalai anak sida nentuka igi penyakit tu enda ngerekai,” terang King Sing.

Kenu ku King Sing, kit peresa chulit kediri ke udah diaku nya nentuka mensia mayuh ulih beperesa chulit kediri.

Enti sema pemutus nya positif, sida mesti berumban madah ngagai Opis Menteri Pengerai Malaysia (KKM) tauka fasiliti pengerai besemak ngambi beperesa RT-PCR ngenukuka pemutus nya.

“Taja pia, bisi sekeda orang enggai madah ngagai staf pengerai enggau ngelalaika pekara nya lalu agi bedagang baka selama taja sida udah ditemu positif,” ku iya seraya madahka ulah baka nya tau ngasuh mayuh agi orang kena rampit.

“Sekali agi, aku ngelalau sida ke udah ditemu positif enggau sengaja enggai madah ngagai KKM tauka nurun gawa tauka bedagang baka selama, sida deka diukum enti raban penerit adat nemu,” ku iya.

Suara Sarawak