Anang sengapa endur muai PPE

KUCHING: Mensia mayuh dilalau anang sengapa endur muai perengka ngelindung diri (PPE) ti udah diguna laban pekara nya deka nyadi penanggul besai ngagai rampa menua.

Kepala Menteri Datuk Patinggi Abang Johari Tun Openg madahka penyampau tubuh rayat di Sarawak bisi 2.91 juta, lalu Sarawak dipelabaka muai urung 628,000 iti sengkabung mua ti udah dikena ke alai pekara tu balat deka ngeruga rampa menua nyema dibuai sengapa.

“Nyema PPE nya enda dibuai enggau betul, pekara tu deka balat meri pangka ngagai rampa menua kitai.

“Angin tauka ujan ulih ngelaratka PPE ti udah dikena labuh ke dalam sungai ngujungka sungai kitai kamah, kelimpah virus Covid-19 nya ulih ngerampit kitai baru,” ku iya.

Abang Johari bejaku munyi nya beserimbai enggau Anugerah Rampa Menua Kepala Menteri (CMEA) di sebuah hotel ditu, kemari.

Nya alai, iya ngansak mensia mayuh ngambika bejimat enggau gelumbang ketiga Covid-19 ti nyadi empas ari pengawa muai PPE sengapa.

Sebedau nya, iya madahka nitihka penerang ari Bank Pemansang Asia ba taun 2020 mengeri besai baka Manila, Kuala Lumpur, Hanoi enggau Bangkok napi penyampau keresa berubat ti dibuai ti majak mayuh iya nya urung 154 ngagai 280 juta tan enti dibanding enggau taun sebedau penyakit Covid-19 ngerekai.

Ku iya, Malaysia ngeluarka 7.04 juta sengkabung mua ti udah dikena ninting hari ari 32.4 juta rayat.

“Taja pan gaya pandemik udah ngemanahka kualiti angin enggau ngurangka gis rumah gadung di selampur dunya ba taun 2020 nyengkaum ngurangka pengamah ai, tang Covid-19 mega bisi meri pangka negatif ngagai rampa menua.

“Ungkup pengerai enggau pemeresi, ngena PPE baka sengkabung mua, sarung jari, penuchi jari enggau sabun penuchi jari udah nyadi pengeruga ngagai pengerai mensia mayuh enggau rampa menua,” ku iya.

Sama bisi datai Sapit Kepala Menteri ti mega Menteri Pemansang Mengeri enggau Pengeraja Asal Kedua Datuk Amar Awang Tengah Ali Hasan, Menteri Utiliti Datuk Seri Dr. Stephen Rundi Utom, Menteri Dagang Temuai, Seni, Main Asal Datuk Abdul Karim Rahman Hamzah enggau ke bukai.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak