Asil seni Cipta 2021 nembiak FSGK, Unimas dipandang chara online

KUCHING: Asil seni nembiak ari Fakulti Seni Gunaan dan Kreatif (FSGK) Universiti Malaysia Sarawak (Unimas) deka dipandangka ngagai mensia mayuh nengah chara online.

Unimas nengah sebengkah penerang media madahka, program ke dikumbai ‘Cetusan Inspirasi Pelajar Tahun Akhir’ (Cipta) sebengkah aktiviti nembiak taun kepenudi ba fakulti nya.

“Aktiviti tu iya nya nyendiaka pelasar ngagai nembiak ngansah penemu pemun dalam ngatur aktiviti seni ti besai.

“Pengawa mandangkan Cipta 2021 mungkur pengawa ngayanka produk enggau asil seni kreatif ti dipilih bekau ari pansik nembiak taun kepenudi tu,” ku penerang nya.

Penerang tu madahka, mensia mayuh mega deka bepeluang meda idea enggau asil kereja nengah media rama iya nya chara pemadu mayuh dikena orang diatu.

“Cipta taun tu deka berengkah ari 24 September nyentuk 24 Oktober sepengelama sebulan nengah chara online.

“Mayuh aktiviti deka digaga laban deka mandangka asil seni nembiak ngagai mensia mayuh awakka ulih dikerembai ngagai renggat entarabansa,” ku penerang nya.

Penerang nya mega madahka, entara seni ti deka dipandangka ila dikumbai ‘Malon’ iya nya siti seni video engkebut ti nyerita pasal diskriminasyen enggau manipulasyen orang lelaki ngagai orang indu.

“Pia mega, Cipta 2021 deka ngayanka siti filem pandak ari nembiak Sinematografi dikumbai ‘Munsop ra Katanaan’ ti nyerita pasal rayat ari bansa Murut,” ku penerang nya.

Berebak enggau nya, Cipta 2021 mega deka ngatur aktiviti Colloquy  Session: Asil Seni Pemadu Manah Cipta 2021, Pekit Kuiz Filem Malaysia, Borak Anak Seni, Virtual Mini Concert enggau Program ‘Let’s Kongsi Tips : Video and Photo Editing Tutorials and Short Film Screening by Cinematography and Animation’.

Aktiviti Cipta tu deka dipanchar terus ba Facebook Unimas enggau Instagram Cipta 2021.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak