Beberapa pekara meransang nyadi soldadu

KUCHING: Mayuh kebuah meransang tiga iku veteran enggau kaban Raban Soldadu Malaysia (ATM) masuk ATM.

Direktor Unit Pengelikun Unimas, Leftenan Kolonel (B) Mohd Melintang Abdullah madah, bemacham insiden ke nyadi dipeda mua iya empu entara pekara ke meransang iya masuk ATM.

Entara insiden ke nyadi iya nya suba aku suah meda raban komunis enggau soldadu Indonesia tama ke Sarawak.

“Aku mega meda baka ni orang ba rumah panjai sedia enggau semampai nyikap diri lebuh nya nangika sida diserang,” ku iya.

Iya ke minat nyadi soldadu kenyau ari mit madah, endur iya diau lebuh nya enda jauh ari adan menua Kalimantan-Sarawak.

Nambahka nya, trajedi ke nyadi ngagai siku pengajar enggau aya iya lebuh nya udah meransang sereta ngasuh iya mutus ati nyadi soldadu.

“Lebuh nya, pengajar enggau aya aku ditegah komunis lebuh nepan bas, pengajar aku bebadi nyawa tekala nya. Aya aku mega bebadi nyawa ketegal balat bakal.

“Insiden tu balat ngasuh aku sinu sereta aku mutus ati deka ngetanka menua enggau semangat Agi Idup Agi Ngelaban sereta enggaika sejarah tu betandu,” terang iya.

Nangkan nya, ex- Panglima Medan Timur Tentera Darat, Leftenan Jeneral Stephen Mundaw (Bersara) madah, gaya pengidup sida sebilik suba udah meransang iya nyadi soldadu.

“Apai enggau aka aku polis, aya aku mega polis. Nya kebuah pekara tu meransang aku masuk soldadu,” terang iya.

Mundaw mega madah, iya agi ingatka kisah ke nyadi lebuh jeman konfrontasi suba.

“Maya nya aku agi mit, suah aku ninga bunyi timbak mesingan maya malam hari tauka tengah malam lebuh ngagai rumah ini seduai aku.

“Lebuh nya kami beguai ningkapka diri ngambi leka seterum nya enda kena kami,” ku iya nusui.

Nambahka nya, ex-Pegawai Pemerintah Regimen 22 Para Komando, Leftenan Kolonel Linus Lunsong Janti madah, iya nyadi soldadu lebuh menua Sibu agi sigau laban lebuh nya baru lepas jeman konfrontasi.

“Aku suba minat deka masuk soldadu laban ninga kereja nya begaji besai sereta gagit deka nemuai ke Malaya.

“Lebuah nya mayuh orang putih, nyau ingin deka nyadi soldadu pengudah meda uniform enggau gaya soldadu taja pen aku nemu mayuh bendar penguji suba,” terang iya.

Bebida enggau Direktor Opis Pekara Veteran (JHEV) ATM Sarawak, Mejar Pahot Joll ke agi gawa dalam ATM.

Entara kebuah iya masuk ATM nya laban rindu macha majalah enggau brochure ke diberi ngagai genturung pendiau iya.

“Maya nya aku agi mit, komunis pen agi bisi. Aku begaut ngambi lalu macha pasal bujang berani enggau pengelikun lebuh bisi majalah diberi ngagai kami,” terang iya.

Ungkup penerang, ketetiga veteran ATM enggau raban ATM tu udah bekunsika peneleba sida lebuh nyadi panel dalam randau online diatur Unimas, ditu ensanus.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak