Begunan baru SK Kampung Tellian udah tembu

MUKAH: Kaban Kunsil Nengeri (Adun) Tellian, Yussibnosh Balo ngarapka begunan baru Sekula Primari (SK) Kampung Tellian ke bepalan semak Kampung Tellian Tengah ulih berengkah dikena maya sekula dibuka kena 3 Oktober tu ila.

Nitihka penerang begunan nya udah ulih dikena laban udah tembu digaga kenyau tiga bulan ke udah.

Ngelansa pasal pemindah nembiak enggau pengajar ngagai begunan nya iya madah, pekara nya bepanggai ba pemutus Opis Menteri Pelajar (KPM).

“Sida (KPM) bisi kuasa ngaga pemutus lebih agi maya menua benung betapi enggau pandemik Covid-19,” ku iya.

Kenu ku iya mega raban bekaul udah ngemendarka nembiak enggau SK Kampung Tellian mindah ngagai palan baru.

MANAH… Begunan baru SK Kampung Tellian ke baru tembu dikearap ulih berengkah dikena 3 Oktober tu ila.

“SK Kampung Tellian udah ngangkut semua perengkaguna sida ari SK Mukah, pia mega staf sukung mega udah mindah,” ku iya maya dirandau pemberita pengudah nyuaka geran projek mit menua pesisir (MRP) ngagai 13 gerempung ukai dikuasa perintah (NGO) ba Palan Servis Dun Tellian ditu, ensana.

Yusibnosh mega madah Gerempung Apai Indai enggau Pengajar (PIBG) SK Kampung Tellian sebedau tu bisi meri geran MRP ke udah diberi ngagai sida dikena melanja ungkus pindah ngagai begunan sekula baru nya.

Ku iya, geran MRP beungkus RM15,000 udah disua ngagai sekula nya kena 14 September tu tadi dikena mayar ungkus mindahka barang enggau meresi sekula nya.

Berebak enggau nya, Yusibnosh ngaku pengawa ngajar enggau belajar (PdP) baka ba menua pesisir lebih agi ba SK Kampung Tellian chara betimpai mua lebih manah.

Tu beduduk ari, ukai semua nembiak bisi ngembuan telefon pintar enggau perengka elektronik ke bukai baka laptop enggau komputer.

MANAH… Begunan baru SK Kampung Tellian ke baru tembu dikearap ulih berengkah dikena 3 Oktober tu ila.

“Tambah mega servis internet bisi penanggul ba sitak nya. Nya alai, tusah apai indai deka nganjung kereban belajar anak diumba sida nadai perengka pengangkut,” ku iya.

Kenyau ari taun 2000, SK Kampung Tellian belajar numpang ba SK Mukah. Tu beduduk begunan lama SK Kampung Tellian sebedau tu balat repuk enggau enda likun endur belajar.

Nya alai, nengah penembu begunan baru SK Kampung Tellian bala nembiak enggau raban pengajar tentu berasai gaga laban udah bisi perengkaguna ke lebih menyana sereta likun.

Adun Tellian…Yussibnosh Balo
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak