Bekerejasama numbuhka Palan Perubat Riman Sarawak

KUCHING: Perintah nengeri deka bekerejasama enggau Perintah Besai numbuhka Palan Perubat Riman Sarawak enggau perengkaguna ti chukup awakka rayat nengeri tu enda ibuh nganjung diri berubat ke Semenanjung.

Menteri Kaunsil Kandang Menua enggau Pengawa Berumah Datuk Seri Dr Sim Kui Hian madahka, tu siti ari pekara ti beguna laban ungkus berubat riman chukup besai sereta ngujungka mensia mayuh enda ulih berubat ngena chara peribit taja bisi insurans.

“Aum deka ngaduka palan nya udah dirandau enggau Ex-Menteri Besai Tan Sri Muhyiddin Yassin enggau Ex-Menteri Pengerai Datuk Seri Dr Adham Baba.

“Taja pia, bekaul enggau ubah baru Perintah Besai tu, kitai ngepun ke semua nya ari baruh alu deka bekerejasama enggau Menteri Besai Ismail Sabri Yaakob enggau Menteri Pengerai Khairy Jamaluddin senentang perambu nya,” ku iya.

Tandu iya, Kepala Menteri Datuk Patinggi Abang Johari Tun Openg mega udah betati deka meri bantu ekonomi ngagai perintah besai awakka rayat Sarawak bulih perengkaguna riman ti manah dalam nengeri tu enggau lengkas.

Perengkaguna peresa Siemens SPECT datai di Opis Nuklear, Palan Jantung Sarawak kena nyukung servis berubat riman di Sarawak.

“Di Sarawak, riman udah nyadi penyakit ba penuduk kedua sepengudah penyakit jantung.

“Taja nengeri kitai ngembuan servis pakar berubat, fasiliti riman ti manah endang diguna awakka rayat nibuh nganjung diri berubat ke Semenanjung,” ku iya.

Nangkan ke pemansang bukai, Dr Sim madahka perengka peresa Tomografi Berkomputer Pelepasan Foton Tunggal (SPECT) ti beungkus RM11.63 juta udah datai ba Opis Nuklear, Palan Jantung Sarawak kena ka Hari Enam ti udah.

Ku iya, enggau perengka peresa SPECT nya, iya deka muka mayuh agi kapasiti Opis Nuklear kena nyukung servis berubat kanser di Sarawak.

Siemens SPECT tu tiga ari tujuh iti perengka berubat ti udah dikemendarka Opis Menteri Pengerai Malaysia (KKM) ba baruh Perintah Perikatan Nasional (PN) Plus ungkup taun 2020-2021.

Iya beterima kasih ngagai perintah PN Plus nengah opis menteri ti udah meri pemendar ungkup semua perengka berubat ti udah diterima serta diguna ba Sarawak tu.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak