Beperesa lengkas, terus ngurung diri entara chara jampat ngurangka kes Covid-19

KUCHING: Chara beperesa lengkas enggau berumban ngurung diri entara strategi perintah ulih ngurangka kes berampit di Sarawak.

Menteri Pengerai Malaysia Khairy Jamaluddin Abu Bakar madahka opis menteri iya udah numbuhka Komiti Khas Meri Timbal Lengkas Nasional sebedau tu lebuh nagang pengerekai kes berampit di Semenanjung.

“Sekeda penemu ti dipelajar ari kes raya di Klang Valley ulih dikena ungkup ngurangka kes rampit di Sarawak iya nya kitai nyelinting rayat ngaga peresa lengkas lalu ngurung diri lengkas lebuh nemu diri positif Covid-19.

“Nya kebuah di Sarawak, pemutus positif ari Kit Peresa RTK Antigen ti digaga ba makmal tauka diri empu udah chukup endur ngurung diri tauka matau pengerai diri ari rumah,” ku iya.

Khairy bejaku munyi nya ngagai pemberita ba aum media pengudah Aum Khas Imunisasyen enggau Ngatur Pandemik di Wisma Bapa Malaysia ditu, kemari.

Ku iya, rayat di menua tu patut beratika pengerai diri enti meda diri bisi ngembuan kelai Covid-19 sida patut anang laun beperesa ngena RTK Antigen lalu ngurung diri lengkas nyema positif.

“Tu chara pemadu engkeman ngagai kitai nagang rampit penyakit nya.

“Nya alai, pekara tu mesti ditesau ngagai semua komuniti enggau mensia mayuh awakka sida sama ngembuan tanggungpengawa ngelaban Covid-19.

“Perintah deka chakah agi ngatur bungkur teknologi kelebih agi di mengeri Kuching, Bintulu, Sibu enggau Miri ngatur program virtual Covid-19 Assesment Centre (CAC),” ku iya.

Iya madahka, CAC siti atur matau pesakit Covid-19 ari rumah lalu nyema pesakit ngelangar atur nya penerang sida deka ditemu polis.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak