Bisi 220 pedagang berejister enggau Centexs Komersial

KUCHING: Palan Penyulut Teknikal Sarawak (Centexs) Komersial nyereta Kimpin Sarawak Digital Mall berserimbai enggau Hari Malaysia bulan September tu.

Menijar Besai Centexs Komersial Shahren Yusri madahka Kimpin Sarawak Digital Mall sebuah kerejasama Kunsil Ekonomi Digital Sarawak, Unit Pengatur Ekonomi Nengeri (EPU) enggau Shopee Malaysia ungkup orang dagang ari Sarawak ngelakuka produk sida nengah e-dagang.

“Centexs Komersial diatu ngembuan 220 iku kaban dagang ti berejister ke alai urung 280 bansa produk deka diayanka ba kimpin tu baka produk pemakai, seni, produk kraf enggau ke bukai.

“Kerejasama tu ila ulih mantu ngelakuka produk menua sereta meri peluang makit ti besai ngagai bala pemeli di Semenanjung Malaysia,” ku iya.

Iya bejaku munyi nya ba aum media Centexs Komersial dipanchar terus ba Facebook Centexs Komersial ditu, apin lama ke udah.

Ku iya, nengah kaul kerejasama enggau Shopee mega, Centexs Komersial ulih ngembuan inisiatif nyual enggau ngelakuka produk nengah pelasar makit digital baka media rama.

“Ungkup taun tu, kami merambu deka mantu 1,000 iku orang dagang Sarawak nyereta Centexs Komersial.

“Sida deka bulih penguntung nyereta kami baka bantu makit, ngelakuka produk, bantu ngulihka lisin ari Institut Piawaian enggau Pemansik Industri Malaysia (Sirim) ngagai produk pemakai enggau ngaga bungkus produk.

“Centexs Komersial sigi endang meri fokus ngagai produk seni asal, laban kami deka mai pesaka Sarawak tu dikelala mensia mayuh kelebih agi rayat Semenanjung Malaysia,” ku iya.

Iya ngarapka orang dagang Sarawak ulih datai ngagai Centexs Komersial sereta ngambi bagi nyereta kimpin nya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak