Bonnie fokus pekit dunya di Georgia

JAGUH powerlifting Para Sarawak, Bonnie Bunyau anak Gustin madah diri sigi enda belelak pengudah abis Lumba Paralimpik Tokyo 2020.

Kebuah pia, ku iya laban deka bebendar ngulihka midul emas ungkup menua ba kategori 72 kilogram ba Pekit Para Powerlifting Dunya ke deka diatur ba Georgia kena bulan November tu ila.

“Udah tu, aku deka nyikap diri napi siti agi pekit dunya ba Georgia ke deka diatur bulan November tu ila,” ku Bonnie.

NYa alai, pemegai rikod dunya nya, awak ke bisi diatu patut dikena manah endur belatih nitihka jam ke udah ditaga.

Bonnie Bunyau enggau empat agi bakih bukai ke bela ngarika menua ba Lumba Paralimpik Tokyo 2020 datai di Kuching kena 16 September tu tadi.

Pemulai raban atlit anak Sarawak tu diambat Menteri Nembiak enggau Lumba Sarawak, Datuk Haji Abdul Karim Rahman Hamzah, Menteri Pengintu Pendiau, Pengelantang Komuniti, Orang Indu, Ruang Bilik enggau Pemansang Anak Mit, Dato Sri Hajah Fatimah Abdullah, Menteri Nembiak enggau Lumba, Datuk Snowdan Lawan, Menteri Muda Pengintu Pendiau Komuniti, Datuk Francis Harden Ak Hollis, Menteri Muda Orang Indu, Ruang Bilik enggau Pemansang Anak Mit, Datuk Rosey Yunus, Tuai Pegawai Eksekutif (CEO) Serakup Lumba Sarawak (SSC), Dr Ong Kong Swee sereta raban tuai opis perintah ba Padang Bilun Entarabansa Kuching (LTAK).

Bonnie madah, iya deka kemisi pengelama seminggu sebedau berengkah baru belatih dibaruh iring jurulatih iya, Jamil Adam.

“Aku deka kemisi pengelama seminggu, udah nya berengkah belatih baru baka selama ba Kuching,” ku iya ke madah diri deka belatih pengelama sebulan ba Kuching.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak