BPR Renggat 3 bepun dibayar pagi ila

KUCHING: Bayar ungkup Bantu Siru Rayat (BPR) Ruang Bilik Malaysia Renggat 3 enggau apil BPR deka dikreditka ngagai akaun penerima berengkah pagi ila (28 September) nengah chara berenggat.

Menteri Besai Datuk Seri Ismail Sabri Yaakub dalam siti penerang media kemari madahka proses bayar bantu tu dipelabaka deka tembu sepengelama tiga hari iya nya kena 30 September ti deka datai.

“Bantu tu dipelaba deka meri pemaik ngagai 3.6 juta penerima ti udah bisi ba kategori ruang bilik enggau peminta apil BPR ti dikemendarka.

“Bayar BPR Renggat 3 enggau apil BPR tu ngena belanja RM2.82 billion,” ku iya dalam penerang nya.

Penerang iya madahka, genap penerima deka bulih bantu nyentuk RM1,400 ke alai bayar apil BPR deka nerima nyentuk RM2,300 nyengkaum bayar BPR tambah ba baruh Program Strategik Negapka Rayat enggau Tambah Ekonomi (Pemerkasa+) penyampau nyentuk RM500.

“Bayar bantu Renggat 3 tu deka ngemenuhka laluh penyampau semua bantu ti diterima penerima BPR enggau apil BPR dalam ngelempungka tating belanja sida,” ku penerang iya.

Ku penerang nya baru, perintah deka terus komited nentuka pengelantang Keluarga Malaysia kelebih agi raban ti diselinting lebuh napi pengerekai Covid-19 terus dijaga.

Pia mega, penerang tu madahka bantu bukai ti deka diberi perintah nangkan tu ila iya nya Bantu Khas Covid-19 (BKC) enggau Bantu Lenyau Penatai Pemisi (BKP) ke alai bantu tu deka diberi ngagai penerima berengkah bulan Oktober ngagai Disember ti deka datai.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak