Festival Sarawakiana diatur sepanjai bulan tu

KUCHING: Pengawa bekunsika video dikumbai Eksibisyen Main Asal Sarawak: Nikah, Melah Pinang enggau Pinchawan siti ari aktiviti ke bisi diatur ungkup nyeridi penemu mensia mayuh pasal pengawa melah pinang nitihka chara tradisional di menua tu.

Librari Nengeri Sarawak nengah siti penerang madahka, program nya diatur nyerumba Festival Sarawakiana ti diatur kena 1 nyentuk 30 September tu ila.

Penerang nya madah, tuju program tu dipejalaika endang dikena nyeridi enggau bekunsika penerang ngagai mensia mayuh bekaul pengawa melah pinang asal di Sarawak.

“Kelimpah nya, kami deka ngayanka Renggat Sarawakiana ti dikemisi Pustaka Nengeri ngagai mensia mayuh,” ku penerang tu.

Nengah video nya, orang ti meda deka bulih penerang pandak bekaul adat melah pinang pupu bansa Sarawak nengah rakam ti diambi ari Renggat Sarawakiana.

“Mensia mayuh ulih meda video tu kena 15 September pukul 11.00 pagi di youtube Pustaka Sarawak enggau Facebook Pustaka Sarawak,” ku penerang nya.

Ungkup penerang, Renggat Sarawakiana diterbitka Pustaka Nengeri dikena ngayanka sejarah, raban bansa, seni enggau main asal, pengarap sereta adat ti bisi di menua tu.

Penerang silik, ulih betelefon ngagai Pustaka Nengeri ba lumur 082-440488 tauka ngelawa emel cmasyima@sarawak.gov.my (Dayang Nur Syima Awang Adrus).

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak