Gaga sekula lumba OKU

OPIS Menteri Nembiak enggau Lumba (KBS) deka berandau enggau Opis Menteri Pelajar (KPM) dikena ngemujurka perambu ngaga sebuah sekula lumba khas ungkup bala nembiak Raban Nyelai Pendiau (OKU)

Menteri iya, Datuk Seri Ahmad Faizal Azumu madah randau nya deka diatur enda lama agi dikena beratika pekara ke patut digaga sebedau pekara nya digaga pemutus.

“Naka tu, raban KBS seruran berandau enggau mayuh opis menteri awakka aktiviti tauka program bepelasarka nembiak enggau lumba tu ulih diatur begulai.

“Dikena numbuhka sekula tu, besampi ngagai Petara ngarapka pekara tu ulih nyadi nyata sereta meri inisiatif ke lebih manah ngambika lumba para lebih mansang laban sida mega ulih ngangkatka nama Malaysia ngagai tikas dunya,” ku iya ba penerang ke dibantai Bernama.

Faizal madah munyi nya nengah sebengkah aum pemberita pengudah ngabas Palan Latih Nimbakka Laja Para Nengeri Perak ba Opis Servis Veteriner Perak, ensana.

Kena 8 September tu tadi, Penyanding Penemu Nasional Alliance Of Mental Health (NAMH) Senator Datuk Ras Adiba Radzi merambu minta perintah ngaga sebuah sekula lumba OKU dikena ngiga rebak baru ke bisi penau lebih agi ba pengawa lumba.

Ras Adiba ke mega Chairman Bernama bisi merambu minta perintah nyendiaka mayuh perengka guna ke pemaik raban OKU di stadium, kompleks lumba enggau padang kelimpah nyendiaka peluang ngagai ex-atlit para dipadu nyadi jurulatih.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak