Gula apung ari Perpat, Saratok

Pun apung tauka nama saintifik iya dikumbai Nypa Fruticans iya nya sebansa utai idup sereta chukup mayuh tumbuh ba menua ili ti ngembuan tanah bepaya tauka kerapa.

Apung tu mega sebengkah utai tumbuh ari purih Arecaceae, mayuh dipeda tumbuh ba selatan Asia enggau di utara menua Australia.

Nitihka penerang pengajar Resa Billie ke gawa ba Sekula Sekondari (SMK) Tabuan Jaya madah diri kala meda chara manduk gula apung maya nemuai ke menua Perpat, Saratok apin lama ke udah.

Kitai sama nemu, mayuh orang rindu makai gula apung ke dibeli sebelah kedai renchit tang nemu enda kini sida baka ni chara orang ngaga gula apung?

Ku Resa, gula apung suah dikena maya orang deka begagaka kuie lebih agi maya musin pengerami Gawai Dayak tauka pengerami bukai.

MAYUH GUNA…Pun apung ti mayuh tumbuh nebing sungai bekerapa ngembuan mayuh guna.

“Aku ngasai diri chukup betuah laban bepeluang meda baka ni orang berengkah ngambi madu mayang nyentuk ke iya tau nyadi gula,” ku iya nusui ngagai Ruai, Suara Sarawak.

DIPANDUK 6-8 JAM

Ku iya, ai madu ti diambi ari mayang apung deka dipanduk ngena api kayu enggau sepengelama enam ngagai lapan jam nyentuk ke iya likat sereta chura betukar chelum bekilat.

“Aku udah meda genap ikas renggat tauka chara manduk gula apung tu enggau mata aku empu lebuh pejalai aku ke Perpat suba.

“Endang sigi amat, ukai nyamai deka ngaga gula apung, orang ti ngereja pengawa tu mesti ngembuan ati ti liat laban pengawa bepanduk ke gula apung tu enda ulih tembu sejam dua kelimpah mesti nakal nat diri ari tepuk asap enggau kena diang pengangat api,” ku iya.

“Pemedis ari renggat keterubah iya nya maya ngambi madu ari mayang datai ke pengawa manduk sampai chura iya tadi betukar chelum sereta likat pan udah umbas iya diasaika.

NIMBUN…Pengajar Resa nguji kediri empu baka ni asai ngereja pengawa nimbun ai madu mayang ba pun apung.

PUN APUNG MAYUH GUNA

“Pun apung tu sigi ditemu kitai mayuh guna, bepun ari buah puda nyamai diempa sereta dan enggau pelepah mega enti ditunu ulih nyadi garam.

“Pia mega daun ditasa ambika atap, ai madu ari mayang digaga ke tuak enggau gula, daun puda (sumbuk) dititi ambika daun ruku tauka kajang.

“Kelimpah upa iya pan nyamai disumai nyadi kelauk lalu mayang puda apung tu ulih digagaka pemanis dikumbai pemanis Jarik tauka Jejari Mayang Apung,” ku pengajar ke asal ari Rumah Sibat, Penurin, Betong.

MANDUK GULA…Pengajar Resa benung beratika chara manduk gula apung.

 

GULA APUNG

 

GULA APUNG
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak