Jelukong, Sungai Basai enggau Lambir deka endur ngaga RSA

KUCHING: Bisi tiga palan Sangkai enggau Belelak (RSA) pemesai 10 ikar digaga ba sepanjai Projek Jalai Besai Pan Borneo Sarawak.

Menteri Kanan Kerja Raya Datuk Seri Fadillah Yusof madah, pengawa ngaga RSA iya nya ba Jelukong, Sungai Basai enggau Lambir.

“Pengawa ngaga RSA ke ngembuan 10 ikar pemesai nya deka nyungkak penatai pemisi pedagang ba menua tu asil ari pengawa muka kedai makai enggau bejualka asil kebun ba pasar tamu dia,” ku iya.

Kaban Parlimen Petra Jaya nya mansutka pekara nya lebuh nyimpul jurai ba Aum Parlimen, ensana.

Ngelansa pekara bukai, iya mega madahka Opis Menteri Kereja Raya (KKR) deka berundingka sentang perambu Perintah Indonesia ti deka ngaga indu mengeri baru ba Kalimantan.

“Nya alai, ungkup perambu muka jalai ba adan Sarawak, opis menteri tu (KKR) udah ngaga inisiatif masukka perambu ngaga jalai raya adan nya nyadi sebengkah ari strategi enggau pekara pansik ba Pansik Baru Pelin Pemansang Ngaga Jalai Raya 2030 (HNDP 2030) ungkup Sabah, Sarawak enggau Wilayah Persekutuan Labuan.

“Peminta ungkup bejalaika pansik nya udah dibantai enggay deka diperundingka Ejensi Besai nengah Rolling Plan 2, Langgur Pemansang Malaysia Lumpar Ke-12 (RMK12),” ku iya.

Nerang silik bekaul enggau isu nya, Fadillah madah ngaga jalai raya nya jemak bepanggai ngagai pansik enggau projek ke dikemerat sereta pemisi belanja perintah.

Suara Sarawak