JKNS, JPBN patut bekerejasama enggau lutur peribit

KUCHING: Opis Pengerai Nengeri Sarawak (JKNS) enggau Komiti Penyangga Penusah Nengeri (JPBN) Sarawak patut bekerejasama enggau lutur palan perubat peribit endur bejalaika pansik pengerai ungkup pesakit Covid-19 Kategori 1 enggau 2.

Tuai Indu Parti Rakyat Bersatu Sarawak (SUPP) Kho Teck Wan madahka, taja pesakit ti bejalaika kuarantin di rumah patut madahka pengerai sida nengah MySejahtera enggau aplikasyen pum Google ninting ari, siti sistem kena mansik pengerai orang sakit di rumah patut diatur enggau lengkas.

“Naka sehari tu bisi 29,788 orang sakit Covid-19 udah bejalaika kuarantin di rumah di Sarawak.

“Aku ngelalau JKNS enggau JPBN bekaul lutur berubat peribit ti deka enggau pengawa nyendiaka pansik pengerai ninting hari nengah telefon ngagai orang sakit Covid-19 ti bejalaika kuarantin di rumah,” ku iya ba siti penerang media, kemari.

Hari Minggu ti udah, Teck Wan madahka dua iti kes midang ketegal Covid-19 bekaul siku lelaki beumur 38 enggau 46 taun sereta nadai ngembuan penanggul pengerai.

Ku iya mega, lelaki beumur 38 taun ditemu positif maya 10 September ti udah, lalu lelaki beumur 46 taun ditemu positif Covid-19 maya 8 September.

“Aku merambu bisi pansik pengerai ninting hari deka dipejalaika ngagai pesakit Kategori 1 enggau Kategori 2 dipejalaika lutur berubat di palan berubat peribit.

“Enggau tu, penyampau lutur ngabas pesakit deka bekurang, lalu tu mega ulih ngemanahka kualiti nyaga pengerai pesakit ti kuarantin di rumah.

“Lutur palan perubat peribit ulih mantu kes ti bekena ka bantu berubat di sepital perintah kena nyeliah kes midang nyadi,” ku iya.

Tandu Teck Wan mega, JPBN enggau JKNS patut bekira deka nyedia Palan Pansik Covid-19 (CAC) ngagai lutur berubat swasta ungkup timpuh ti udah ditetap awakka mayuh agi raban pengerai perintah diasuh gawa di sepital enggau ngemeratka pengawa ngubat pesakit di sepital aja.

“Kitai deka idup enggau Covid-19, kitai patut betatika pengawa nyelamatka nyawa enggau ngurangka penyampau orang ti midang ketegal Covid-19.

“Aku deka ngelalau raban lutur palan perubat peribit bela ngambi peluang kerejasama enggau JKNS sereta JPBN kena nyediaka pansik pengerai ngagai pesakit Covid-19 ti benung bejalaika kuarantin ba rumah,” ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak