Jorjanne dara penakan Kadazan-Dusun Iban landik bemain sape

SIKU nembiak penakan Kadazan-Dusun Iban, Jorjanne Samantha Eiai Jabit,15, ngembuan pengelandik bemain kereban muzik baka sape, drum enggau gitar.

Penau Jorjanne asil ari sukung apai iya, Jabit bin Sopining ke mega siku pengajar gawa ba SK St Martin Merdang, Kota Samarahan.

Apai iya seruran nganjung Jorjanne belatih bemain sape ba sebengkah kelas muzik.

“Maya keterubah aku nebah sape, aku chukup rindu ninga alun munyi iya ke chukup manah sereta ngasuh ati lantang.

“Munyi sape keterubah didinga aku iya nya ungkup tanda Datun Julud iya nya sebengkah muzik suah dimainka raban orang Orang Uu,” ku iya maya dirandau Suara Sarawak.

SERURAN NYUKUNG…Pengajar Jabit Sopining (kiba) deka terus meri sukung penuh ngagai Jorjanne ngambika terus mujur nyapai juluk diri lebih agi ba pengawa bemain sape.

Jorjanne kala bulih anugerah pirak kategori solo bemain drum maya ngarika Sarawak ba Pekit Festival Band Entarabansa ke diatur nengah chara digital ba taun siti nyin kemari.

Ngembuan juluk deka nyadi lutur jelu Jorjanne meransang raban rabak baru sama bebendar nyapai juluk ati diri.

“Bemain kereban muzik ukai semina dikena ngisi jam lepa tang mega ulih mantu aku ngurangka pengusut runding.

“Aku chukup gaga ati laban sape ke dikena aku diatu asil ari digaga apai aku empu,” ku iya.

Jorjanne mega kaban Kelab Pancharagam ba St Teresa sereta kala mantu sekula iya teulihka midul emas ba pekit nya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak