Kisah Menggong 7 : Dipadu milih raban Sarawak Renjer keterubah

Pemarai Leftenan Bald ba trajedi betempur enggau munsuh ba ulu Sungai Labis ke 13 November 1952 dipansik sebengkah raban pemansik nyengkaum raban polis ari Pampang Khas (CID).

Semua tanya ke dibantai raban pemansik, mujur disaut Lans Koperal Menggong anak Panggit enggau manah nyentuk raban pemansik berasai tepantup ati. Niang Leftenan Bald mujur dikuburka ba pendam Kristian di Tanjung Pagar, Singapore.

Beberapa hari pengudah pansik nya tembu, semua kaban platun ari No.1 Platun Kompeni Alfa Batalion Satu Rejimen Cameronian Scottish Raifle Light Infantry nerima C.N.C (Comander in Chief Certificate) iya nya setipikit basa pemerintah Soldadu Darat British di Timur Jauh ari Jeneral Sir Charles Keightley.

Kena 26 November 1952 sekali agi raban platun sida Menggong nyapai pemujur ke chukup ngemegah dalam sebengkah operasyen di sebuah kampung Air Panas.

ASP Menggong anak Panggit

SARAWAK RENJER

Udah nya, ba pun Januari 1953, Menggong sekali agi ditikika pangkat ngagai Koperal. Bekau ari pemujur niki pangkat nya, iya dianjung gawa ke Port Dickson sereta diasuh mangku pengawa nyadi Jurulatih sereta diasuh milih nembiak masuk soldadu ngagai Unit Batalion Rejimen keterubah dikumbai Sarawak Renjer.

Beduduk ari nya, Koperal Menggong begulai enggau raban bukai betuaika Kapten Micheal neresa selampur pelilih menua di Sarawak baka Kapit, Sibu, Kanowit, Song enggau pelilih menua ke bukai ngiga orang nyadi soldadu.

Mayuh nembiak Iban dipilih masuk soldadu. Lebih ari 300 iku nembiak Iban ke pas diperesa dipilih lalu dibai nyadi soldadu Sarawak Renjer keterubah. Pekara nya chukup meri pengaga ati ngagai Koperal Menggong.

Ari Kuching, raban nembiak Iban tu tadi dibai nepan kapal ‘Raja Brooke’, udah nya datai ba Seremban sida diasuh nepan kerita api ke Port Dickson lalu dilatih nyadi soldadu pengelama tiga bulan.

Pengudah tembu ngelatih raban nembiak Iban nya, enda memukai Menggong nerima surat betukar pangku pengawa. Menggong begulai enggau 10 iku soldadu ke baru abis belatih diasuh gawa ngagai Kem Erskine, Kuala Kubu Baru.

Koperal Menggong diasuh ngiring tim baru ke dikumbai Raban Batalion, Rejimen The Queen Own Royal West Kent. Beberapa hari udah gawa, Menggong dikangau betemu enggau Pegawai Pemerintah, Leftenan Kolonel Thompson.

Dia Menggong chukup tekenyit laban nerima jaku pengaga ati ari pegawa pemerintah madahka iya diberi kelai basa pemadu tinggi soldadu nerima anugerah ‘George Medal’ ari Ratu Elizabeth.

Menggong chukup gaga ati laban pengujung iya pemerani enggau penyulut iya dalam pengawa soldady nerima basa ke chukup tinggi. Taja pia, Menggong enda kala lupai diri enggau ngenang saup ari bala bakih bukai dalam tim. Enti nadai sukung ari bala bakih bukai tentu pemujur nya tusah deka dijapai iya.

Bekau ari pemujur nerima anugerah ‘George Medal’ nya, dia Koperal Menggong berengkah nerima elaun ninting bulan sepenyampau $20.00. Anugerah nya disuaka Ketuai Tinggi British ba Tanah Melayu Sir Gerald Templer ba King House, Kuala Lumpur kena Januari 1954.

MAYUH PEMUJUR

Ngelansa sekeda pemujur bukai maya ngiring Kompeni Charlie, nyadi ketuai Platun No.9 dia Koperal Menggong kala bedengah dua iku munsuh ba operasyen di kampung Bukit Perabung di pelilih Hulu Selangor kena 25 April 1953.
Nangkan ke nya, kena 3 Mei 1953 sekali agi raban sida betempur enggau munsuh ba Sungai Kerling sereta Menggong mujur nimbak mati dua iku munsuh.

Pia mega, kena 5 Julai 1953 ba sebengkah operasyen di Ladang Getah, Batang Kali tim sida Menggong mujur munuh tiga iku munsuh. Siku ari munsuh mati kena timbak Menggong.

Udah nya, ba operasyen di Tanjung Malim kena 10 September 1953 tim sida Menggong sekali agi betimbak enggau 30 iku komunis. Tang pengujung iya, semina siku aja munsuh mujur dibunuh sida nengah asil timbak Menggong.

Pia mega ba operasyen di kampung Bentong, Pahang kena 19 November 1953, tim Koperal Menggong enggau Leftenan Neath mujur nimbak siku munsuh.

Taun siti kena 26 Febuari 1954, ba operasyen ba sebuah ladang getah di Bentong raban sida Menggong betimbak enggau 50 iku munsuh. Tiga iku munsuh mujur dialahka sida, dua ari munsuh ke mati nya asil kena timbak Menggong pengudah sida bendar bepupuh ngalahka pangan diri.

Kena 1 April 1954, nyadi hari ke chukup besai reti ngagai Koperal Mengong iya nya mujur niki pangkat ngagai Sarjan. Bekau ari nya, Sarjan Menggong pulai baru gawa ba Kem Port Dickson.

Urung tiga taun gawa ba Port Dickson, Sarjan Menggong pan ngetuka servis nyadi soldadu.

PINCHIN SOLDADU

Kena 4 Mei 1957, Sarjan (B) Menggong anak Panggit pinchin gawa nyadi soldadu pengudah 10 taun bejalaika servis sereta nyapai mayuh pemujur berekat ari pemerani tulin purih anak Iban. Iya neruska pengidup lalu pulai ke menua asal di Sarawak.

Pemulai Menggong ke menua disambut sida sebilik enggau penuh pengaga ba Rumah Ningkan, Tapang Pungga.

Pengelenggau Menggong ke sida sebilik ketegal lama gawa nadai ulih pulai sengapa ba menua orang berasai terubat. Lalu pia mega, mayuh cherita dikunsika Menggong ngagai sida menyadi dikena ngubat pengelenggau sida ke balat gauk ke iya.

Berengkah sehari nya, Menggong nulung apai enggau indai iya ke endang udah tuai ngereja pengawa ba rumah panjai.

Enda lama udah nya, Menggong pan nirika rumah tangga lalu milih Elda Tayot anak Penghulu Jayan nyadi ke bini ke mega siku indu dara ari Nanga Embaluh, ba pelilih Lanjak, Kalimantan Barat. Seduai iya dipadu jadi kena 17 March 1957. Kebendar Elda ukai orang jauh kena bala sida Menggong empu.

Nyau enda berasai, bulan beganti bulan, taun beganti taun. Hari siti, rumah panjai sida Menggong di Tapang Pungga ditiki raban pemesai betuaika Sekretari Perintah Sarawak, Encik Barkorf.

Enda disadang Menggong pemuas ke lama berandau cherita iya sekumbang nyadi soldadu nerima perati Encik Barkorf. Menggong kebendar nyau nadai ati agi masuk soldadu, tang iya dipinta Encik Barkorf gawa enggau perintah nyadi Polis Hutan.

NYADI POLIS HUTAN

Kepuas ke berunding enggau diri sebilik, Menggong setuju enggau peminta Encik Barkorf. Kena 19 Ogos 1957, Menggong berengkah gawa nyadi Polis Hutan.

Menggong dipadu nyadi koperal sereta ngiring siti sekyen tim Polis Hutan. Kena 25 November 1962, operasyen keterubah diasuh munaska raban penyelawai ba Brunei. Maya nya Brunei benung charut besai.

Taja tanggungpengawa nya berat, tang Koperal Menggong terus nyangup pengawa enggau nadai berasai sebarang penanggi laban ke endang bisi peneleba nyadi soldadu.
Bisi 20 iku raban Polis Hutan ke bepengkalan ba Miri diasuh ke Limbang.

Nitihka penerang sekeda nembiak Sarawak ari Limbang, Lawas, Bekenu enggau Sunder bisi ke parit penemu ari sepiak nulung Tuai Parti Rayat Brunei A.M Azahari enggau Zulkifli ngaga penyarut.

Tuju penyarut ke digaga sida Azahari berengkah 8 Disember 1962 laban deka numbangka perintah dipegai Sultan Sir Omar Ali Saifuddien Sa’adul Khairi Waddien.

Pengawa ngelaban keruga tim Azahari nya, enda berapa nyamai laban tim sida nya endang dikelala bisi ngembuan penemu kebal, tusah deka telih laban senyata tajam. Taja pia, tim sida Menggong nadai ngeri mimit tang majak teperansang dela ngalahka sida Azahari.

Maya nya chukup balat menua Brunei sigau. Mayuh endur mujur dialahka tim Azahari baka balai polis Temburung, Balai Polis Kuala Belait enggau Balai Polis Seria. Semina Indu Opis Polis Kontijen Polis Brunei aja enda mujur dialahka tim Azahari ke mega endur sultan Brunei belalai. Raban ari Rejimen 42 komando datai nyaup ngetanka kubu polis ba balai tu.

Di Bekenu, raban penyelawai mujur ngalahka balai polis nya. Tang enda lama udah nya, sida mujur dialahka unit Green Jacket soldadu British.

Ba sebengkah operasyen di Sunder raban sida Menggong nangkan 25 iku penyelawai. Pia mega, kena 12 Disember 1962 raban sida Menggong mujur nangkap 342 penyelawai ke mega peranak kampung Melayu ba Awat-Awat ti nyukung penemu Azahari. Asil ari pemujur nya, Menggong ditikika pangkat nyadi Sarjan.

Penyarut digaga sida tim Azahari mujur dipuntan kena Febuari 1963. Udah nya, menua Brunei enggau utara menua Sarawak pan mupuk pulai likun baka selama. Taja pengawa chukup ngemegahka Sarjan Menggong.

Kisah Menggong dilekaka aku naka tu dulu, minggu baru kitai nampung iya ke ujung agi ngenang pasal penyarut ke nyadi di Sarawak ketegal mantah Sarawak enggau numbuhka Malaysia.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak