Kitai patut sedia idup begulai enggau Covid-19

SIMANGGANG: Anang enggai nerima (vaksin), pia lalau Menteri Muda Pengintu Pendiau enggau Pengelantang Komuniti, Datuk Francis Harden Hollis senentang Program Imunisasyen Covid-19 Nasional (PICK) raban nembiak di Sarawak ti bepun Hari Tiga ti udah.

Ku Adun Simanggang nya, pengawa ngambi vaksin penuh Covid-19 udah nyadi siti pekara ti patut nitih situasyen di Sarawak ke deka nuju renggat endemik enda lama agi.

“Enti perintah udah netapka Covid-19 nyadi endemik, kitai patut besedia neruska pengidup begulai enggau igi penyakit tu.

“Berebak enggau nya, ngambi vaksin penuh siti pekara ti patut diadu sereta aku ngelalau bala apai indai meransang anak sida ngambi vaksin laban tu aja chara ulih dikena kitai ngurangka penyadi empas kena rampit penyakit tu,” ku iya.

Iya bejaku munyi nya sepengudah nyuaka bantu ngagai peranak ti kena Atur Mindah Betagang Bepekul (PKPD) ditu.

Ku iya, PICK ba raban anembiak tu beguna amat kena nyedia sida sebedau pengawa sekula betungga mua dibuka bulan Oktober ila.

Harden nguluka pejalai raban Adun Simanggang, SUPP Pampang Simanggang sereta bala serakup indu udah nyuaka bantu pemakai ngagai Rumah Panjai Kaunselor Munan, Nanga San enggau Rumah Panjai Story @ Julai di Entawa Wong Padong.

Ku iya, bantu tu tambah ngagai bantu ti keterubah di udah diberi nengah Opis Raban Bansa Bagi (PKMB) Sri Aman kena ngelempung tating penusah sida ke PKPD.

Iya mega nyuaka chek bepenyampau RM23,000 bantu ari Sapit Kepala Menteri Datuk Amar Douglas Uggah Embas ngagai Kaunselor Munan Amoh ti ngarika peranak rumah panjai nya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak