Minta KKM mutar lengkas penanggul suntuk pengajar Jaku Iban

KUCHING: Sarawak napi penanggul suntuk pengajar Jaku Iban lalu pekara tu mesti dikemerat Opis Menteri Pelajar Malaysia (KPM).

Kaban Parlimen Betong, Datuk Robert Lawson Chuat madah, kebuah laban jaku nya diaku ba renggat tinggi dalam silibus di menua tu.

Iya madah, Jaku Iban diajar ba sekula primari kenyau ari taun 1957 enggau sekula sekondari kenyau ari taun 1963 nyadi subjek tambah ungkup nembiak Primari Satu ngagai Pom Lima.

“Penanggul tu tau ngeruga inisiatif nambahka pengawa nguasa jaku Iban ngagai nembiak Sarawak enti sema penanggul tu enda diputar.

“Kitai bela nemu, penanggul suntuk pengajar nyadi ba selampur menua baka dipadah Menteri Kanan Pekara Pelajar pasal KPM deka bejalaika pengawa ngambi khas 18,702 pengajar DG41 dikena mutarka penanggul suntuk penagajar ke lama udah nyadi dalam sistem pelajar menua,” terang iya.

Robert mansutka jaku nya lebuh nerima titah Seri Paduka Baginda Yang Di-Petuan Agong lebuh Aum Keterubah Penggal Keempat Parlimen Ke-14 ba indu mengeri, ditu kemari.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak