Nembiak mesti likun sebedau sekula dibuka

SARATOK: Tuju Program Meri Vaksin Raban Nembiak nentuka raban diselinting likun sereta udah divaksin sebedau buka sekula.

Kaban Parlimen Saratok, Datuk Ali Biju madahka renggat keterubah program ngaul raban nembiak beumur 16 enggau 17 taun udah bepun ari 11 September nyin tadi.

Ku iya, perintah naka ulih nentuka raban ti patut betuchuk deka nerima vaksin taja pengawa dipejalai berenggat tang pekara pemadu beguna diatu tuju dijapai.

“Kitai ba sitak Parlimen Saratok ditu mujur nyapai Imuniti Beraban ke alai abis nadai 80 peratus ari penyampau tubuh peranak besai tuai udah betuchuk dos vaksin penuh urung 41,000 iku.

“Nya kebuah perintah nampung pengawa nyaga pengelikun rayat ke alai diatu datai ba gintir raban nembiak nerima vaksin dipejalai nitihka renggat umur.

“Ba pun pejalai program tu mega nitihka slot hari bulan ti udah ditetapka raban sekula penerima vaksin nya empu,” terang iya.

Ali ke mega Adun Krian mansutka jaku nya lebuh ngabas Palan Meri Vaksin (PPV) Ungkup Raban Nembiak ba Dewan Balai Polis Kabong ditu, empai lama.

Tembu pengawa dia, iya enggau bala bukai nampung pejalai ngabas PPV Dewan Sri Krian, Saratok seraya matau penyikap perengka guna dia chukup.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak