Nuan Bungai Ati Ku lagu baru ari Jack Peter

Nuan Bungai Ati Ku siti lagu betabuh Joget disabung siku agi penanyi baru Iban benama Jack Peter Tanom.

Dirakam sepengelama dua bulan diatu lagu Nuan Bungai Ati Ku udah ulih dipeda ba youtube sereta naka tu udah dipeda sepenyampau 4.2k iku orang ba Channel Youtube H & J Entertaiment.

Jack anak tuai ari enam iku diri menyadi asal ari Saratok tu madahka penyampau orang meda lagu siti kelai ti manah ngagai siku penanyi ti disema ‘baru ada’ baka iya.

“Penyampau pemayuh orang meda nyadika peransang ngagai aku ke baru masuk ba dunya pemerindang lagu Iban.

“Enda nyangka teulihka penyampau orang meda ngemayuh nya taja agi baru lagu nya udah ayan ba youtube.

JACK PETER TANOM

“Nya alai, pemujur nya deka nyadi peransang enggau pengering ngagai aku udah tu, ” ku iya seraya madah diri kala masuk sekeda Pekit Belagu di Bintulu enggau Saratok.

Lagu tu ditempa Jiri Jang Kidang, lalu nyeritaka kisah siku indu dara ti seruran tusah ati laban selalu ditinggalka pangan iya belelang gawa dimenua bukai nyentuk ke bebulan-bulan lalu ba jam ti sama pangan lelaki iya bedanji deka meri sebentuk tinchin lebuh maya iya pulai baru ke menua.

“Taja jauh entara menua, tang kaul entara seduai semampai ‘bau rengut’ enda sesalah baka bungai ngerembai pepagi hari.

“Semua penguji sekumbang nanggam pengerindu taja jauh ari pangan mujur ditapi lalu ngujungka seduai iya jadi melaki bini,” ku iya ke mega madahka diri chukup rinduka semua main asal Iban kelimpah ari pengawa belagu.

Berebak enggau nya, Jack meri besai terima kasih ngagai peminat ti seruran nyukung iya ba pengawa belagu.

“Enti nadai sukung ari peminat, sapa mih tudah aku. Anang lembau ngelawa Channel Youtube H & J Entertaiment,” ku iya.

Suara Sarawak