Pegung Nyemerai Delta deka disikap menyana

SIBU: Palan pegung nyemerai ungkup anak mit ba Pegung Nyemerai Delta deka dikemansang sereta disikap menyana ungkup guna mensia mayuh.

Chairman Komiti Mendam Besai enggau Servis Perintah Kaunsil Mengeri Sibu (MPS) Kaunselor Donna Petrus Ngelai madah, palan nya deka disikap enggau sekeda kereban dikena bemain ke udah diperambu ngagai raban kaunsil.

Kenu ku iya, ungkus dikena ngemujurka perambu nya udah disedia lalu ngarapka projek nya ulih dipejalaika taun baru.

”Taun baru, nyema nadai penanggul kami deka bejalaika projek tu iya nya ngaga pegung nyemerai baru ungkup anak mit laban kami udah nemu penyampau ungkus nya.

“Tuju tu dikena matak mayuh agi anak mit datai ngelawa Pegung Nyemerai Delta enggau mega matak ati bala apai indai mai anak sida datai kia.

DONNA (depan, tengah), Ting (belakang, dua kanan) sereta bala bukai beratika perengkaguna ke patut diadu manah ba Pegung Nyemerai Delta.

“Pegung nyemerai ke diperambu nya ngembuan penalam ke numbas iya lalu likun ungkup anak mit kelimpah disikap enggay sekeda kereban dikena bemain,” ku iya, maya ngabas palan nya kemari.

Kena Hari Minggu tu tadi, Donna enggau kaban komiti disempulang CHairman si MPS Kaunselor Clarence Ting Ing Horh ngabas pegung nya ba Jalai Delta ditu.

Nya alai, iya madah sebedayu tu pegung nya udah bisi pegung ungkup anak mit.

“Enti projek nya udah tembu, Pegung Nyemerai Delta nya deka bisi dua iti pegung ungkup anak mit,” ku iya.

Nangkan ke nya, iya madah entara pekara ke dikena ditambah manah ba endur nya nukar atap ba pintu tama.

Donna madah, atap nya mesti digaga awakka meri pengelantang apai indai ti deka ngambi anak sida lebuh maya hari ujan.

Iya madag, pintu penama deka diadu manah dikena nentuka pengelikun nitihka Atur Pengawa Standard (SOP) ke terit.

Perengka guna ungkup raban orang nyelai pendiau (OKU) mega deka dikemanah udah tu ila, ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak