Pemanah kaul enggau diri sebilik ngasuh ati lantang

SELIMAN anak Bandang,111, udah mujur diaku siku lelaki ke pemadu gayu ba menua tu sereta dipasuk dalam Bup Rikod Malaysia (MBOR) apin lama ke udah.

Asal ari Rumah Mulok, Klua, Krian, Saratok tudah tuai ada kena 21 March 1910.

Iya kebendar anak keempat ari tujuh iku diri menyadi. Iya nirika ruang bilik begulai enggau Imbok anak Gira (niang nadai taun 1983) tang seduai enda mujur bulih anak lalu semina ngiru dua iku anak.

Ari purih dua iku anak iru nya, diatu Seliman bisi ngembuan semilan iku uchu enggau 13 iku ichit sereta umbuh lapan iku.

ENGKAYU BABAS

ANAK…Seliman (tengah) megai setpikit basa ari MBOR sereta begambar kenang enggau dua iku anak iya, Tuai Rumah (TR) Mulok (kiba) enggau Mani (kanan).

“Nadai tentu bepenti iga ga pasal utai diempa, semina aki aku deka sereta selalu bendar belauk ke engkayu babas panduk rebus genap kali maya makai.

“Kelimpah ari nya, iya rindu bendar belauk ke lauk pansuh,”ku Michael nyerita ngarika aki iya lebuh dirandau Ruai,Suara Sarawak.

Nambah nya, iya ke nyengala dipeda ngelama tu, aki aku chukup jaga ba sentang takah jam maya alai iya ngintu diri tauka belelak (tinduk).

ANANG LAUN TINDUK

“Aki aku enda kala laun tinduk ari pukul 9 malam ninting hari lalu baka nya mega angkat dani ari siti pukul 7.30 pagi.

“Nyangka tu mih siti ari kebuah aki aku tu ulih gayu nguan menua nyentuk sehari tu,”ku Michael nyerita ngelansa pasal pengawa ninting hari dikereja aki iya.

UBAH DUNYA

“Sekumbang 100 taun tu berasai gaga bendar ati laban ulih meda ubah enggau pemansang dunya lebih agi bepeluang meda penyadi Jalai Pan Borneo.

“Kelia kala ngasaika jeman merinsa maya pegai perintah Jipun merintah lalu bekuasa di Sarawak.

“Suah ngena guni diambi nyadika gari dikena ninting hari laban nadai ulih undur ke pasar bebelika pekayan.

“Puji Tuhan,nyentuk sehari tu, aku agi diberi petara ‘peluang’ ti chukup berega alai aku ulih ngasaika asai betundi begagai enggau bala uchu enggau kebukai ninting hari,”ku iya.

Mulaika pengingat maya agi biak suba, Seliman madahka diri endang balat rinduka pengawa ngasu beburu begiga ikan sebelah sungai maya lepa.

RINDU NGASU

BALA UCHU ICHIT…Gambar Seliman begulai enggau semua bala uchu iya.

“Maya agi regas suba, sigi rinduka pengawa ngasu lebih agi begigaka ikan sebelah sungai.

“Lalu semua ikan tauka dagin ulih begiga nya tadi,enti bisi lebih ari guna diri empu endang seruran dibagi aku enggau kami serumah magang.

“Laban maya nya suba, endang naka nya pengawa ti bisi dikereja kena ngapuska hari.

“Ukai baka kemaya diatu, mayuh macham pekara tauka utai ulih dikereja bala nembiak dikena beperindang.

“Kepenudi, guna mih awak jam enggau manah dikena begulai nanggam kaul enggau pangan diri lebih agi diri sebilik laban ari nya tau ngasuh ati kitai lantang lalu ngujungka batang tubuh enggau runding tau bepengerai,”ku iya ti madahka diri semina deka ngabiska jam ninting hari betundi begagai enggau bala uchu.

 

BALA UCHU ICHIT…Gambar Seliman begulai enggau semua bala uchu iya.
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak