Pemanah Pantai Trombol di Telaga Ai matak ati temuai

Pantai Trombol sebedau tu nadai dikelala, diatu majak mayuh mensia napatka palan nya lebih agi peranak ke diau ba sitak Kuching ti lelenggauka pengawa ngelantang ati di tebing tasik.

Bepalan ba Telaga Ai, Pantai Trombol mega sebengkah palan ke chukup manah enti deka beratika matahari padam.
Kelimpah ari nya, Pantai Trombol mega tampak enti deka meda pemanah Gunung Santubong, Pulau Satang sereta sebuah kapal karam kelia.

Pia mega, Pantai Trombol tu chukup besai sereta panjai sebaka enggau pemesai Pantai Pugu di Lundu ngujungka palan tu chukup dikerinduka mensia mayuh.

Asil perati Suara Sarawak tebal agi mensia mayuh ngelala pantai tu pengudah iya ayan ba ba media rama.

Entara, aktiviti ke bisi dipejalaika baka mandi, bemain gudi, bejualka pemakai sereta duduk berandau, ngambi gambar enggau ke bukai.

MATAHARI PADAM…Pendiau matahari padam ngilah pukul 6.30 lemai di Pantai Trombol.-Gambar Ramidi Subari

Lebuh dirandau siku temuai ke raun kitu, Jeniffer Nida Ganai, iya madah diri nemu pasal pantai tu pengudah bisi dikemegau ba media rama.

Ngelansa pasal pemanah pantai nya, iya madah pantai nya manah ketegal ai ke chiru sereta bechura biru.

“Taja pan pantai tu udah dikelala mensia mayuh sereta mayuh orang datai, tang orang ke datai kitu dilelau terus nitihka Atur Pengawa Standard (SOP) ke udah ditetapka raban bekuasa.

“Kami nitih aja SOP ke udah ditetapka lalu ngarapka mensia mayuh ke deka datai kitu bela sama nitihka SOP,” ku iya maya dirandau Suara Sarawak, kemari.

Nangkan ke nya, siku agi temuai ke raun kia Kean Weltin Dennis salleh, 24 madah diri tepaut ati meda pemanah Pantai Trombol laban chukup besai sereta lantang endur merindang ati.

“Ai ke chukup chiru sereta pantai ke besai ngasuh mensia mayuh tepaut ati datai kitu,” ku iya.

SAMA NITIH SOP

Ku iya, temuai ke ngelawa Pantai Trombol mega seruran nitihka SOP baka ngena sengkabung mua.

“Nya alai, aku ngarapka orang ke datai kitu seruran nyaga pemeresi awakka pantai tu enda kamah.
“Aku ngarapka perintah ngaga Pantai Trombol tu nyadi palan eko-dagang temuai,” ku iya.

Nangkan ke nya, Presila Canda, 23 mega ngaku pemanah Pantai Trombol taja lama udah nadai datai ke pantan nya.

“Tebing Pantai Trombol chukup manah sereta besai baka ba Pantai Damai.

“Pantai tu endang ngembuan pemanah kediri empu sereta bepenau matak penatai temuai,” ku iya.

MATAHARI PADAM…Pendiau matahari padam ngilah pukul 6.30 lemai di Pantai Trombol.-Gambar Ramidi Subari

Presila ngarapka temuai ke datai ke Pantai Trombol bekerejasama nyaga pemeresi sereta anang muai uras sengapa.

Ba penemu Zulfadhli Romzi, pengawa muka Pantai Trombol ngagai mensia mayuh ngujungka peranak genturung pediau ke besemak ulih nambahka penatai pemisi nengah chara bedaja ba endur nya.

Ku iya, Pantai Trombol suba sunyi nadai dikelala orang tang diatu chukup mayuh orang datai lalu nya nyungkak penatai pemisi sida ke bisi bejual ditu.

“Laban gaya hari ke chukup angat, tebal agi sida ke datai bebelika pemakai, ai irup, bemain gudi enggau ke bukai.

“Nya alai, aku ngarapka perintah ulih nyendiaka perengkaguna ke patut ngagai raban pedaja baka kami awakka meri pengelantang ngagai bala temuai ke datai,” ku iya.
Anang ngamahka pantai

Taja pia, pemanah pantai nya diperati bisi kamah mimit ketegal ulah sekeda raban ke enda mereti.

Kenu ku Amyza Hanim Othman, taja pantai tu udah dibuka endur ngelantang ati tang agi bisi sekeda orang muai uras sengapa enggau ngatur pengawa belumba enda beradat.

“Laban ke nyadi siku ari pedaja ke mega peranak genturung pendiau ditu, aku sinu meda pemanah pantai kamah ketegal uras.

“Nya alai, ngagai mensia mayuh ke deka raun ngagai pantai tu, aku ngaraoka sida badu muai uras sengapa.

“Besaup mih kitai nyaga pemeresi pantai tu,” ku iya.

MANAH…Entara temuai ke datai raun sereta bemain ba pantai nya ensana.-Gambar Ramidi Subari

 

Jeniffer Nida Ganai

 

Presila Canda

 

Zulfadhli Romzi

 

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak