Pemujur Sarawak ngubah undang-undang Perintah Besai

KUCHING: Perintah Sarawak deka nyadi malin ba pengawa ngubah undang-undang Perintah Besai ke meri empas ngagai perintah nengeri tu, ku Kepala Menteri Datuk Patinggi Abang Johari Tun Openg.

Ku iya, nya entara pemujur ke chukup besai ari Perintah Sarawak ngambi pulai kuasa enggau hak ke udah lenyau ngelama tu.

“Pemujur bukai dijapai kitai nyengkaum nentuka perambu projek pemansang besai di menua tu ngemeratka Pelin Pemansang Lima Taun Sarawak bepanggai ba agih belanja ke udah dikemendar.

“Pejalai projek deka dikerandau entara opis menteri enggau Perintah Sarawak baka nentuka endur sekula, sepital enggau bejalaika projek pemansang bukai kelebih agi di menua pesisir,” terang iya.

Abang Johari mansutka jaku nya lebuh Pengerami Hari Malaysia Renggat Nengeri Sarawak di Dun Petra Jaya, malam ensana.

Ngelansa baru, iya madahka Sarawak diatu bisi hak ngemendarka Pegawai Undang-Undang Negeri baka Pedawa Raya di baruh Kanun Prosedur Jenayah bejalaika pengawa dawa ba penyalah di baruh undang-undang nengeri ari renggat kort baruh nyentuk renggat apil.

“Pia mega, Opis Imigresyen Sarawak deka nambahka pengawa puang ngambi neritka atur lebuh bisi 100 pengawa puang baru disediaka.

“Penyampau pengajar Sarawak mega ditambah urung 90 peratus ari penyampau pengajar ke gawa ditu nentuka tagit ulih dijapai lalu pengawa ngambi pengajar sementara mega mesti diperunding,” terang iya.

Iya ke mega Tuai Perintah Gempung Parti Sarawak (GPS) meri jamin Perintah Sarawak deka bebendar ngambi baru hak Sarawak ke lenyau nengah pengawa berandau enggau Perintah Besai.

“Aku meri besai terima kasih ngagai Menteri Besai Datuk Seri Ismail Sabri Yaakob laban semampai siruka pengelantang rayat Sarawak,” ku Abang Johari.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak