Pemujur Watt Enjup enggau Darren Mengga patut dichuan rebak baru

SARATOK: Pemujur Watt Enjup enggau anak iya, Darren Mengga nyadi pemekit ti deka ngarika tim Malaysia ba World Championship Perfoming Arts (WCOPA) di Disneyland, California,Amerika Syarikat (USA) patut nyadika peransang ngagai semua raban nembiak lebih agi sida ke bisi pengelandik bemain kereban muzik.

Menteri Muda Nembiak enggau Lumba, Datuk Snowdan Lawan madahka pemujur ke dijapai apai enggau anak tu patut dichuan nyadika peransang ngagai raban pemain kereban muzik tradisional baka Sape enggau ke bukai di Sarawak ngichaka udah tu ila mayuh agi sida iya ke bepenau ulih diangkat ngagai tikas entarabansa.

“Ukai nyamai ngulihka pemujur baka ke dijapai seduai tu menyanak. Tu disema siku dalam sejuta teulihka pemujur masuk ngagai pekit ke chukup besai, lebih agi seduai nyau datai ba pekit tikas dunya.

“Berasai temegah lalu aku meri pengaga ati ngagai Watt Enjup enggau Darren Mengga ti udah mujur dipilih ngarika Malaysia ba pekit World Championship Performing Arts (WCOPA).

“Tu siti ari berita iya ke pemadu manah mega nyadi kelai ngagai pengelandik anak Sarawak diaku ulih datai ngagai tikas dunya enti dipujur, diterenak, disungkak nengah jalai ti betul,” ku iya.

Berita Ruai, Suara Sarawak bekaul enggau pemujur dua menyanak ti dipilih ngarika Malaysia ngagai pekit dunya 2022.

Iya ke mega Adun Balai Ringin madah munyi nya lebuh dipinta meri timbal bekaul enggau pemujur dua menyanak (Father and Son) tauka Watt Enjup enggau anak iya, Darren Mengga ke mujur dipilih ngarika Malaysia ba World Championship Performing Arts (WCOPA) 2022.

Nangkan ke nya, Snowdan meransang nembiak rebak baru lebih agi peranak menua pesisir ti bepenau sereta landik betebahka kereban muzik asal baka Sape enggau ke bukai anang takut mantaika pengelandik diri nengah chara masuk gerempung (NGO) ngambika sida bisi ‘payung’ ti ulih mantu tauka ngiring sida masuk sesebengkah pekit.

“Nya alai,aku meransang bala nembiak rebak baru lebih ba menua pesisir anang sesekali napuk pengelandik dikembuan diri.

“Enda ngira iyaka landik nebah kereban muzik tradisional tauka utai bukai.

“Pemadu beguna anang enda masuk gerempung awak bisi orang ngiring ngembing kitai nyapai juluk ati,” ku iya.

Lebuh ditanya bekaul enggau bantu sukung belanja ngagai dua menyanak tu, Snowdan madah pekara nya deka dikenatai ngagai Opis Menteri Dagang Temuai, Seni enggau Main Asal sereta Opis Menteri Nembiak enggau Lumba awakka diperunding lalu iya empu deka mai seduai nya menyanak ngelawa orang atas.

“Enti ulih, aku minta lalu ngarapka seduai menyanak datai berandau betungga mua enggau aku empu udah tu.

“Laban agi bisi pekara bukai ti bekaul deka dikerandau enggau nyentuk agi enggau seduai sebedau mai seduai betemu enggau orang atas,” ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak