Peratika reti merdeka, keingatka jasa tuai kelia

BALINGIAN: Pengerichah Program Merdeka@Komuniti renggat Pelilih Balingian tetap diasai taja pengawa nya diatur jelan aja.

Program Merdeka@Komuniti diatur Opis Pemadah (JaPen) Malaysia nyerumba ngintu Bulan Kebangsaan enggau Hari Malaysia nya diatur ba genap pelilih menua begulai enggau komuniti ba menua diri.

Taja pia ba pengerami serak tu, program diatu nitihka Atur Pengawa Standard (SOP) kelimpah penatai temuai ke ditatak.

Nya alai, ba renggat pelilih Balingian, program diatur ba laman Opis Pemadah Pelilih Mit alingian.

Berebak enggau nya, JaPen Balingian mega bisi ngatur aktiviti Info On Wheels (IOW) Merdeka nengah jaku tesau enggau nyadung surat berita bekaul enggau polisi perintah.

Program nya majak richah enggau penatai 25 kerita enggau motosikal Konvoi Jalur Gemilang ke dipasuk ejensi perintah enggau mensia mayuh.

Program bejadika sida ti masuk program nya dikemujurka Che Ghazali Arbi ti ngarika Adun Balingian.

Sida ke nyereta konvoi udah nya bejalai ngelingi Pasar Balingian, Kampung Pulat, Kampung Masjid, Kampung Lintang sebedau ngetu ba laman opis JaPen Balingian.

Ba jaku iya, Ghazali minta semua raban beratika reti merdeka enggau ingatka jasa bala tuai kelia ke udah bebendar ngetanka menua ari pekuh kuasa luar.

“Pengawa sida nadai ngarapka sebarang perais lalu ngujungka kitai idup lantang baka ke sehari tu.
“Kitai patut meri terima kasih laban diau ba sebuah menua ke lantang sereta merdeka,” ku iya.

Berebak engagu nya, iya bisi nyuaka kit perengka berita ari
JaPen enggau Jalur Gemilang ngagai bala konvoi enggau mega ungkup bala tuai raban bansa enggau tuai rumah ke bisi datai.

Bela bisi datai, Penulung Pegawai Pengawa Pengawa Pelilih Mit Balingian, Abdul Malik Talip enggau Tuai Polis Pelilih Mukah, DSP Muhamad Rizal Alias.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak