Perintah deka terus ngintu rampa menua enggau manah

KUCHING: Pengawa ngintu rampa menua deka terus nyadi batang pekara dikemeratka Perintah Sarawak, ke alai perintah naka ulih meri perati ti adil entara guna pemansang enggau pengelantang rayat.

Kepala Menteri Datuk Patinggi Abang Johari Tun Openg madahka perintah Gempung Parti Sarawak (GPS) nyemetak udah mujur dalam Aum Sempekat Malaysia 1963 (MA63) ngujungka menua tu ulih megai penuh kuasa bekaul rampa menua nengah Rang Undang-Undang Pengeraja Asal Enggau Rampa Menua (Ubah) 2019.

“Ubah nya nyengkaum ngemendarka Kaunsil Pengeraja Asal enggau Rampa Menua (NREB) negapka atur undang-undang enggau atur ngelindung kualiti rampa menua di Sarawak.

“Nengah pekara tu, pengawa nunu nadai pemendar ba palan Tanah Hak Adat Bumiputera (NCR) ungkup tuju komersial diatu udah diatur awakka pejalai projek sosio-ekonomi enggau program transformasyen di menua ulih dipejalai meruan,” ku iya.

Abang Johari bejaku munyi nya beserimbai enggau Anugerah Rampa Menua Kepala Menteri (CMEA) diatur ba sebuah hotel ditu, kemari.

Ku iya, ukum ngagai semua penyalah bekaul rampa menua baka ngamahka tanah, ngamahka palan nakung ai enggau nunu nadai belebas udah ditambah ngagai RM100,000.

Kelimpah ari nya, iya madahka ubah ordinan mega mungkur kategori pengereja pengawa NREB ti nyadi pemesai ba baruh Akta Kualiti Persekitaran (EQA) 1974 awakka ubah kuasa penerit adat ari Opis Rampa Menua Malaysia ulih diatur.

“Aku ngansak NREB ngambika nyikap diri enggau merambu strategi sida ungkup 10 taun ti deka datai nengah pengeraja enggau pengereja pengawa ti manah.

Ku iya, strategi tu patut disukung undang-undang, atur ti manah enggau engkeman, atur ti disikap enggau sistem teknologi pemadu baru sereta tanggungpengawa ti meri empas besai.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak