Projek jalai ari Jematan Batang Sadong ke Kpg Sabun, Simunjan tembu diseruri taun baru

KUCHING: Peranak di sitak Simunjan deka bulih perengkaguna infrastruktur baru asil ari pengawa nyeruri jalai raya ari Jematan Batang Sadong ngagai Kampung Sabun, Simunjan lalu dipelabaka tembu kena 7 Januari 2022.

Menteri Muda Infrastruktur enggau Pemansang Penyangkai Kapal Datuk Julaihi Narawi madahka, kereja nyeruri jalai raya pemanjai 9.43 kilometer (km) ari 20.41 km nya digaga ngena teknologi CIPR (Cold in Situ Pavement Recycling).

“Sida madahka naka tu projek nya baru manggai 35.90 peratus tembu enti dibanding enggau taga asal 38.14 peratus.

“Enti nadai penanggul kereja ti udah berengkah kenyau 8 Januari tu dipelabaka tembu 7 Januari taun baru,” ku iya rambau ngabas projek nya, kemari.

Ku Adun Sebuyau nya, projek beungkus RM25.6 juta nya dikemujurka serikat Perbena Emas Sdn Bhd nengah agih belanja Perintah Sarawak.

“Besai buka jalai tu 6.5 meter, ke alai tisi jalai ngilah kiba enggau kanan pemesai 2.5 meter,” ku iya.

Tandu iya, jalai nya beguna ngagai peranak dia kelebih agi sida ti diau ba Dun Simunjan enggau Sebuyau sereta palan bukai di Bagi Menua Samarahan.

“Jalai tu mega nyadi kaul entara jalai pesisir di Sadong Jaya enggau Sebuyau sereta Jalai Pan Borneo di Simunjan enggau Gedong,” ku iya.

Berebak enggau nya, ngelansa teknologi CIPR, tu sebansa chara baru dalam pengawa kereja enggau dikira nyadi projek pemungkal ngagai Opis Menteri Infrastruktur enggau Pemansang Penyangkai Kapal kelebih agi jalai alun ba tanah kerapa.

Entara projek pemungkal bukai ti ngena teknologi tu iya nya Jalai Raya Ulu Suai pemanjai 19 km ti nyau deka tembu.

Taja pan ungkus teknologi CIPR tinggi, tang chara ngaga iya lebih manah enti dibanding jalai alun konvensional sereta asil mega lebih bekualiti ari jalai raya ke udah bisi.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak