Rayat mesti nemu reti 16 September

KUCHING: Semua rayat Malaysia mesti nemu pemesai reti hari besai 16 September dalam tipan sejarah menua.

Kepala Menteri Datuk Patinggi Abang Johari Tun Abang Openg madah, Perintah Besai udah ngenukuka 16 September nyadi hari besai kelai ngingatka penumbuh Malaysia.

Iya mega ngarapka pekara tu deka meransang semua rayat meretika hari besejarah tu.

“Penumbuh Malaysia nyadi sebuah menua ari tiga wilayah tu patut dijaga nengah semangat bebasaka pangan diri.

“Pia mega, pekara tu nentuka kitai ngelala hak ke udah dipasuk dalam Konstitusyen nitihka Sempekat Malaysia 1963 (MA63) enggau Suruhanjaya Cobbold,” terang iya.

Chairman Pengatur Program… Datuk Lee Kim Shin

Abang Johari mansutka jaku nya lebuh Pengerami Ngintu Hari Malaysia 2021 Renggat Nengeri Sarawak diatur di Dun Sarawak, malam kemari.

Ku Abang Johari, mayuh pekara enda dipejalai nitihka konstitusyen enggau MA63.

Nya kebuah ku iya, pekara tu mesti diperunding nyadi sebuah Keluarga Malaysia ke besai.

“Aku ngarapka inisiatif terus berunding pasal MA63 baka dalam Sempekat Pemereti Ati (MoU) Transfomasyen Penegap Politik entara Perintah Besai enggau blok penyakal kena 13 September tu tadi deka meri penguntung ngagai perintah nengeri enggau perintah besai,” terang iya baru.

Abang Johari mega bekunsika sekeda pemujur ngambi baru hak ke udah lenyau sekalika chara sengaja tauka enda baka royalti minyak enggau bayar.

Nambahka nya ku iya, komiti begulai entara Perintah Besai, Sarawak enggau Sabah udah ditumbuh lalu dibetuai Menteri Wang enggau Menteri Kanan Kereja Raya.

Iya madah baru, komiti nya deka berandauka hak Sarawak enggau Sabah bekaul minyak enggau gis nengah chara komersial lalu nadai nengah atur undang-undang.

Dulu ari nya, Menteri Perengka Pengangkut Datuk Lee Kim Shin ke mega menteri bekuasa ngintu hari besai taun tu madah, kitai agi ngena rambai jaku Malaysia Prihatin lalu tu nunjukka perintah semampai betatika nasip enggau pengelantang rayat.

Ku Kim Shin, rayat Malaysia udah bebendar nunjukka penyiru diri maya pandemik lebuh sida bekerejasama enggau gerempung ukai dikuasa perintah (NGO) sereta serikat nyuaka bantu ngagai rayat ti tusah.

Sama datai Tuai Pemegai Menua (TYT) Tun Pehin Sri Abdul Taib Mahmud enggau bini iya, Toh Puan Datuk Patinggi Raghad Kurdi Taib, bala Sapit Kepala Menteri, Menteri Kabinet Sarawak enggau Sekretari Perintah Sarawak, Datuk Amar Jaul Samion.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak