Rebak baru diperansang belajarka pengawa beranyam

Enti kelia kitai suah ninga orang indu ke diau ba rumah panjai jarang enda nemu ngereja bemacham pengawa baka beranyam, nyumai, betenun, enggau ke bukai.

Tang empas jeman ti majak berubah sereta nyau mayuh pengerindang bukai. Sekeda ari pengawa asal ke dikereja raban bisi dileka pia aja laban mayuh raban indu nyau bisi batang pengawa kediri bai nya ba opis perintah tauka peribit lalu ngembuan penatai pemisi tetap dikena meli keresa nya enggau muntang.

Nya alai, diatu nadai mayuh agi orang indu ti agi ngemeranka pengawa nganyam tikai, perampan, lanji, raga, chapan, jagan tauka ke bukai.

ASAL ULU KOTA, PAKAN

LANDIK…Elizabeth benung nganyam tikai plastik.

Serak tu Ruai, Suara Sarawak bisi berandau enggau siku ari indu rumah panjai ke balat angkunka pengawa beranyam tu iya nya Elizabeth Betty, 51 ari Rumah Ajau, Ulu Kota, Pakan.

Kenu ku indai ngagai empat iku anak tu, pengelebih diau ba rumah panjai endang diguna manah lalu iya agi ngereja semua pengawa orang indu kelia baka nganyam lanji, tikai enggau raga.

“Seriris enggau ubah dunya kemaya hari, aku ngubah chara nganyam ari bemban ngagai buluh enggau tali plastik.

“Semua pengawa tu digaga aku empu, laban diatu lanji enggau raga ti digaga ari buluh nerima timbal ti manah ari bala pemeli,” ku iya lebuh dirandau Suara Sarawak, kemari.

Ku Elizabeth, beranyam buluh mar agi ari tali plastik, laban proses ngaga lanji enggau raga ari buluh begunaka awak ti lama.

BIDA KEREBAN ANYAM

“Tang enti nguna tali plastik enda lama laban tali tu mudah dibeli ba kedai nitihka chura dikedeka diri semina rega bisi mar mimit.

“Tang nyema nguna buluh jauh bida, kitai deka kiruh mayuh pengawa dikereja baka begigaka buluh sebelah babas, nebang kediri, san bai pulai ke rumah, mesti dikikis muai miang enggau dijembi dulu sampai rangkai,” ku iya.

Nangkan ke nya, ku iya, buluh ti udah rangkai deka dichat nitihka chura dikedeka pemeli sebedau dijembi baru awakka chat nya lekat.

“Udah chat rangkai, baru aku deka ngelit buluh nya alus nitihka penebal ti dikedeka.

“Buluh ti udah dilit tu meh dikena aku ngaga raga enggau lanji,” ku iya.

REGA NITIH PEMESAI

INDU RUMAH PANJAI…Elizabeth benung nganyam raga.

Ngelansa sentang rega kraf ke dianyam iya, Elizabeth madah diri bejualka semua produk jari nitihka pemesai.

“Rega raga enggau lanji dijual aku ari rega RM80 nyentuk RM120 sigi ke alai rega tikai dijual aku entara RM250 ngagai RM700 selambar.

“Aku nyual produk tu nengah chara ‘online’ tauka ‘offline’ nitihka ni ti muntang endur pemeli ngiga aku.

“Kekadang sida betelefon, nengah pesan enggau ngusung aku ke rumah milih ni bagi produk ti deka dibeli sida,” ku iya.

Iya madahka berengkah pengerekai Covid-19 taun siti tu tadi iya napi pemar lebuh deka ngepos enggau nganjung barang ti dibeli orang laban tusah deka mindah kelimpah nangika diri dirampit penyakit nya.

PENANGGUL ARUS PENYAMBUNG

“Pia mega, teknologi arus penyambung di menua ti enda deras mega nyadi penanggul ngagai aku ngelakuka produk tu laban aku semina ulih online lebuh nurun ke kebun.

“Ambika chunto, lebuh bisi pemeli deka meli tikai sida nganjung pesan ngagai telefon tauka facebook aku, nyau dua tauka tiga hari baru aku ulih malas pesan sida iya laban di rumah arus penyambung nadai deras,” ku iya.

Seraya nya, iya mega madahka diri agi suntuk modal sereta kereban ti chukup dikena ngaga pengawa nganyam.

“Aku endang ngarapka bala perintah tauka ejensi bekaul ulih ngerundingka penanggul kami dimenua baka latih ti engkeman ungkup indu rumah panjai, mantu ngatur lisin dikena kami bedagang, mantu ngerejisterka kami ngagai Opis Kraf jari Malaysia tauka insentif bukai.

“Kelebih agi laban produk kraft ari buluh ti ngembuan peluang besai dikerembai nyadi produk tradisional Sarawak.

MANAH …Entara produk kraf ke udah tembu dianyam Elizabeth.

NGETANKA PENGAWA ASAL

MANAH …Entara produk kraf ke udah tembu dianyam Elizabeth.

“Aku mega andalka produk tu ulih ditanka, awakka enda punas dudi hari,” ku iya.

Iya mega andalka, nembiak rebak baru enda lembau belajar pengelandik nganyam taja pan enda diau ba menua agi.

“Pengelandik orang tuai mesti ditampung laban penemu sida dalam pekara tu enda tau punas.

“Kelimpah ari nya, kitai mega mesti ngetanka pengawa orang indu di rumah panjai laban nya meh kelai bansa kitai di menua.

“Aku ngarapka semua pengawa digaga aku tu nerima timbal manah ari semua orang lalu aku beterima kasih ngagai kami serumah ti balat udah nyukung pengawa aku tu,” ku iya.

Mensia mayuh ulih ngiga Elizabeth ba lumur 0194868521 tauka ngelawa facebook iya empu Elizabeth Betty nyema deka meda asil keranjai jari indu rumah panjai tu.

 

 

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak