Rh Mawang, Tatau nerima belanja RM1.89 juta dikena ngentak rumah baru

BINTULU: Peranak ari 35 pintu Rumah Mawang di Tatau nerima agih belanja RM1.89 juta ari Perintah Sarawak dikena ngentak rumah panjai baru pengudah rumah panjai sida angus dalam taun 2018.

Menteri Muda ba Opis Kepala Menteri (Undang-Undang enggau Adat Bumiputera) Datuk John Sikie Tayai madah, entara bantu diberi iya nya penyampau RM420,000 (RM12,000 ungkup tiap pintu bilik) ke digumpul ari Timber Cess Fund.

“Pia mega, peranak 22 pintu rumah panjai nya mega nerima agih belanja penyampau RM1.47 juta (RM70,000 ungkup tiap pintu bilik) di baruh Wang Turu Penyangga Penusah Sarawak.

“Nya alai, semua bantu diterima peranak Rumah Mawang dikena ngentak rumah panjai sida nya penyampau RM1.89 juta,” terang Sikie.

Sikie mansutka jaku nya lebuh ngabas Rumah Mawang di Nanga Takan Ulu Anap, apin lama ke udah.

Ba taun 2018, Rumah Mawang dituntung penusah angus tengah malam.

Beduduk ari nya, peranak rumah panjai nya udah ngentak dua buah rumah panjai iya nya Rumah Mawang enggau Rumah Andrew.

Ba lansa sama, Adun Kakus nya madah, Perintah Sarawak mega ngagihka bantu ke sebaka ngagai peranak Rumah Michael China enggau Rumah Sengalang di Tatau.

“Perintah Sarawak mega ngagihka belanja penyampau RM700,000 ngagai 10 pintu Rumah Michael China enggau RM770,000 ngagai 11 pintu Rumah Sengalang,” terang Sikie baru.

Suara Sarawak