Robert Lau chakah mantu nembiak tusah ngena geran senator

SIBU: Senator Robert Lau Hui Yew meri perati ngagai nasip raban nembiak ari ruang bilik ke tusah ditu kelebih agi maya betapika enggau pandemik Covid-19.

Ku Lau, raban tu mesti dibantu beduduk ari mayuh apai indai suntuk belanja enggau penatai pemisi kusut ketegal pandemik tu.

Lau mega madah, sida mega diau ba mengeri lalu ditambah enggau penatai pemisi kusut kelebih agi apai indai ke bisi anak agi besekula.

“Munyi ku dipadah bala pengajar, bala apai indai nembiak ditu suntuk belanja ketegal pandemik lalu begunaka bantu.

“Kami semampai ngenatika penusah ke nuntung sida laban sebedau tu mayuh sekula nyengkaum gerempung ukai dikuasa perintah (NGO) kala madah ngagai aku pasal pekara tu,” terang iya.

Beduduk ari nya, Hari Minggu tu tadi Lau udah nyuaka bantu pemakai ngagai nembiak Sekula Primari (SK) Bandaran Sibu No.2 ba sekula nya.

Ku Chairman SUPP Pampang Bawang Assan nya mega, iya udah ngagihka belanja ari geran ke diungkung ngagai senator.

“Kena Hari Minggu tu tadi, aku udah limpang nyuaka bantu pemakai ngagai 59 iku nembiak ba sekula nya.

“Kepala pengajar enggau pengajar udah ngelala nembiak ke patut nerima bantu tu,” terang iya baru.

Lau mega madahka iya deka bekerejasama enggau raban sekula nyaup ngelala nembiak ke patut dikenati nentuka nadai siku nembiak kena tinggal ari nerima bantu tu.

“Aku udah ngasuh raban sekula ngelala nembiak nya lalu ngempung nama sida ke patut diberi bantu tu.

“Kami enggai nembiak tu kena tinggal laban bantu ke disediaka aku tu ulih ngasuh penanggul ditapi sida lempung agi.

“Nya alai, aku deka ngena geran ke diagih ngagai aku nyadi Senator ngambi nyaup raban nembiak ke tusah di Sibu,” terang Lau.

Suara Sarawak