Sarawak deka ngalih ngagai endemik

KUCHING: Sarawak benung merambu ngalih ngagai renggat endemik lalu enda ulih ba timpuh bepekul belama iya beduduk ari 90 peratus orang tuai besai udah nerima vaksin.

Menteri Muda Kaunsil Kandang Menua enggau Pengawa Berumah, Datuk Seri Dr Sim Kui Hian madah, sekumbang napi pandemik Covid-19, Sarawak udah bebendar bejalaika program meri vaksin dikena nagang igi penyakit nya.

“Opis Pengerai Nengeri Sarawak (JKNS) benung merambu ngalih ngagai renggat endemik laban diatu nyau deka 90 peratus orang besai tuai udah nerima vaksin.

“Sarawak udah bekenanas bejalaika program meri vaksin lalu diatu, menua tu nyadi nengeri keterubah meri vaksin ngagai raban nembiak beumur 12 ngagai 17 taun,” terang Kui Hian.

Ku iya, Sarawak agi selamat laban nyapai peratus meri vaksin ke tinggi sereta ulih nyeliahka sida ke kena Covid-19 balat ngasaika pemedis taja varian Delta udah ngasuh kes positif nambah ba menua tu.
“Pekara tu deka ngurangka penyampau kes pemati sereta penyampau tama ke sepital,” ku Kui Hian nerang.

Ungkup penerang semua, pengawa meri vaksin ngagai raban nembiak beumur 12 ngagai 17 taun di Sarawak udah berengkah dipejalai kena Hari Tiga tu tadi.

Kelimpah ari nya, tu ngujungka Sarawak nyadi nengeri keterubah bejalaika program meri vaksin ngagai raban nembiak beumur baruh 18 taun.

Suara Sarawak