Seilu Ilu lagu baru ari Rozana JD

Rozana JD, siku penanyi Iban ari Somba Mix Audio and Video Production ke bepalan ba Kuching datai baru enggau sebuah lagu baru betabuh ‘slow rock’ diberi nama Seilu Ilu.

Tiun enggau leka lagu Seilu Ilu tu ditengkebang Peter Augustine lalu muzik iya ditusun Kevin Flyhigh.

Ngelansa pasal cherita dalam lagu tu, Rozana madah iya nya nyerita pasal siku indu ti seilu ilu ketegal baru putus pengerindu.

Taja pia enda memukai bungai pengerindu entara indu enggau sulu ati iya nyumbuk baru.

“Pekara ke ngasuh seilu ilu dalam lagu nya kebendar ngenang tudah diri ke udah lebu asa nanggam pengerindu tang enda mujur ulih sangkai ba adan sereta puntan disambung baru ungkup kedua kali laban laban lelaki nya udah bisi sulu baru.

Rozana JD

“Leka lagu Seilu Ilu tu kebendar nadai nadai marit pasal pengidup sesapa sekalika dalam dunya nyata tang semina cherita kelulu dalam lagu dikena kitai beperindang.

“Lagu tu mega dirikod enggau pengelama seminggu aja laban nitihka peminta komposer,” ku iya madah ngagai Ruai, Suara Sarawak.

Nangkan ke nya, lagu tu mega dikeluarka nengah kerejasama Somba Mix Production begulai enggau CMD Jamming And Studio.

Mensia mayuh ulih meda lagu tu ba Channel Youtube Somba Mix minggu baru.

Berebak enggau nya, Rozana madahka sebana diri empas ari pengerekai Covid-19 di menua tu.

“Baka penanyi bukai ke mega laban ke tejanggal penatai pemisi ketegal Covid-19, aku bisi begagaka piza, kuie enggau kek lalu dijual dikena nambahka penatai pemisi beduduk ari palan dagang penganta baka salon ke lama ditutup.

BAKIH…Rozana (duduk, tengah) begulai Mix Cyril kayam (duduk, kiba), Louis (bediri, kiba) enggau Peter Augustie.

“Kitai sama nemu, diatu peminta kangau merindang agi diketu lalu sigi tusah deka ngiga penatai belanja,” ku sebana penanyi ke asal ari Kampung Pelaie Baruh, Simunjan.

Entara lagu Rozana ke kala hitz iya nya Apai Ka Bebini Baru digaga Jimbun Mulang taun 2017.

Udah nya, Rozana kala nguji masuk dunya melakun nengah filem pandak Tunjang Pengidup begulai enggau kompeni Grand Spectrum Sdn Bhd, taun 2015.

“Enggau peluang tu aku meri terima kasih ngagai Jimbun Mulang laban iudah nyadi orang keterubah mai aku masuk dunya pemerindang ba taun 2016.

“Ba lagu Apai Ka Bebini Baru nya suba dikeluarka dalam album kompilasyen begulai enggau lagu penanyi bukai baka Johnny Tuk enggau Majorie Albert.

“Pia mega, terima kasih nuju bala bakih aku Ernest Undi enggau Cyrix Kay sereta Cyril kayam ke mega orang kuat ba Somba Mix laban udah meri aku peluang ngerakam lagu ba serikat sida.

“Enda tinggal nuju bala peminat dikesayau ke aku, arapka kita terus meri sukung. Arapka industri pemerindang lagu Iban terus maju,” ku iya.

 

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak