Sektor ekonomi dibuka penuh bepanggai ba pemujur program vaksin

SRI AMAN: Pengawa muka sektor ekonomi penuh di menua tu bepanggai ngagai pemujur program meri vaksin Covid-19 ti benung dipejalaika.

Kepala Menteri Datuk Patinggi Abang Johari Tun Openg madahka, iya andalka pengawa meri vaksin ulih tembu tumu.

“Kitai deka meda gaya pengawa meri vaksin tu, enti pengawa tu udah tembu, udah tentu rayat kitai majak kering ngelaban penyakit nya.

“Ari nya baru kitai ulih muka semua sektor ekonomi,” ku iya.

Abang Johari bejaku munyi nya ba aum media pengudah ngabas Watefront Sri Aman ditu, kemari.

Iya madahka, kitai deka idup begulai enggau Covid-19 tang iya andalka rayat ulih nyaga pengerai diri.

“Taja pan, penyampau rampit Covid-19 di Sarawak tinggi diatu, tang rampit nya semina ba Kategori 1 enggau Kategori 2.

“Rampit tu enda balat ngeruga pengerai, nya reti iya, Covid-19 deka nyadi endemik di menua kitai.

“Kitai bisi pengering ngelaban rampit nya, pekara ti patut digaga kitai iya nya nyaga pengerai diri,” ku iya.

Iya madahka, engka ba siti hari ti deka datai baru bisi ubat ti ulih ngubat Covid-19.

“Tadi aku baru udah ngabas Waterfront Sri Aman, nya reti iya sektor kunteriktor udah dibuka.

“Kedai makai pan udah buka, tang mesti nitihka Atur Pengawa Standard (SOP).

“Nya alai, enti deka makai ba dalam kedai, orang nya mesti udah genap divaksin,” ku iya.

Iya mega, meri perambu ngagai rayat meresa pengerai diri nengah Kit Test Covid-19 kediri empu di rumah.

“Diatu rega Kit Test nya semina RM19.90, lalu aku ninga kemari (ensana) Menteri Wang deka nurunka agi rega perengka tu,” ku iya.

Ngelansa SOP pejalai tama ke Sarawak, iya madahka pekara nya agi dipatau.

“Enti kitai udah datai ba siti tikas endur Opis Menteri madah semua manah, baru kitai deka meda baru pekara pasal pejalai tama ke menua tu,” ku iya.

Suara Sarawak