SJKC Chung Hua Batu 4 1/2 agi ngiga belanja RM1.5 juta

KUCHING: Sekula Primari China (SJKC) Chung Hua Batu 4 1/2 agi begunaka urung RM1.5 juta belanja ungkup projek nambahka begunan di sekula nya.

Menteri Kaunsil Kandang Menua enggau Pengawa Berumah Datuk Sri Prof Sim Kui Hian madahka projek nambahka begunan sekula nya kebendar begunaka agih belanja sepenyampau RM7 juta.

“Perintah Sarawak sebedau tu udah beri agih belanja RM1.5 juta ke alai pagi tu (kemari) aku bejadika pengawa meri agih belanja tambah RM1.3 juta ngujungka semua agih belanja ari perintah penyampau RM2.8 juta.

“Sekula tu empu udah mujur ngiga kediri agih belanja nengah sekeda aktiviti ti diatur sida penyampau RM2.5 juta, tang sida agi ngiga agih belanja penyampai RM1.5 juta,” ku iya.

Kui Hian bejaku munyi nya lebuh ditanya pemberita ba pengawa nyuaka replika chek penyampau RM1.3 juta ngagai raban Kaunsil SJKC Chung Hua Batu 4 1/2 ditu kemari.

Ku iya, agih belanja ari Perintah Sarawak nya sebagi ari agih belanja RM10 juta ti diberi perintah ungkup pemaik sekula bansa China di serata Sarawak.

“Bisi 60,000 iku nembiak pupu raban bansa besekula ba 120 buah SJKC di Sarawak laban SJKC ukai ungkup bansa China aja,” ku iya.

Iya madahka, ba baruh ulu (dibawah pimpinan) Kepala Menteri Datuk Patinggi Abang Johari Tun Openg sebuah komiti khas dikena matau agih belanja diberi perintah ditumbuhka ungkup magi adil agih belanja tu ngagai sekula ti patut.

“Taun siti tu tadi penyampau agih belanja diberi Perintah Sarawak bisi RM8 juta ke alai agih belanja nya dibagi ngagai 12 buah SJKC.

“Ungkup taun tu Perintah Sarawak meri baru agih belanja penyampau RM10 juta lalu agih belanja tu deka dibagi ngagai 16 buah sekula.

“Nya alai, nyema projek sekula nya udah berengkah kami deka beri pengelabih agih belanja dulu ngagai sida laban nyema projek nya laun digaga engka bayar projek deka majak mar,” ku iya.

Sama bisi datai Presiden Komiti Pengatur Bantu Sekula Primari Kuching, Samarahan enggau Serian Jonathan Chai, Mandal Chairman Kaunsil SJKC Chung Hua Batu 4 1/2 enggau bala bukai.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak