Terenak semangat sayauka Malaysia

ASAJAYA: ‘Kembara Merdeka’ beserimbai Hari Malaysia ti deka datai diatur Unit Komunikasyen Perintah Sarawak (Ukas) begulai enggau Opis Pelilih Menua Asajaya sereta Opis Pemadah Sarawak.

Menteri Dagang Temuai, Seni enggau Main Asal Datuk Abdul Karim Rahman Hamzah madahka pengawa ngitauka Jalur Gemilang nyadi tanda negapka semangat Merdeka enggau patrotik rayat menua tu.

“Ba Malaysia, kitai patut temegah laban menua kitai udah ngasaika Merdeka, nya nandaka kitai udah ulih megai menua kitai empu sereta nadai agi bepanggai ngagai kuasa menua luar.

“Ambika chunto, sitak Samarahan enggau Asajaya entara palan pemadu tinggal ari sukut pemansang sebedau Merdeka.

“Tang, pengudah Merdeka perambu jalai alun enggau pemansang infrastruktur udah mayuh digaga ba Asajaya,” ku iya ba aum media pengudah Bejadika Program Kembara Merdeka di Asajaya ditu, kemari.

Ku iya, entara pemansang ti kala diasaika peranak di Asajaya iya nya projek jematan ti bepun ari Tembirat nuju Sadong Jaya.

Karim ti mega Adun Asajaya madahka perambu meruan udah digaga ungkup nentuka pemansang ari sukut jalai alun enggau pekara arus penyambung.

“Mayuh pengawa diatur beserimbai Hari Malaysia deka digaga ba Kuching kena 16 September tu ila ba Kunsil Nengeri Sarawak.

“Kami nagang penyampau tubuh pesereta ba pengawa ngintu Hari Malaysia tu laban kes Covid-19 majak ngirauka di Sarawak,” ku iya.

Iya madahka, pengawa nya engkeman diatur dalam nerenak semangat sayau sereta talukka menua kelebih agi nembiak rebak baru.

Iya mega meri terima kasih ngagai semua ejensi bekaul ti udah ngemujurka semua program nya.

Suara Sarawak