Titih SOP ungkup pengelikun diri

KUCHING: Mensia mayuh patut bejalaika tanggungpengawa diri empu nitihka Atur Pengawa Standard (SOP) ukai ketegal takut diukum tang kena nyaga diri enggau ruang bilik sida semampai likun ari dirampit igi penyakit Covid-19.

Sapit Kepala Menteri, Datuk Amar Douglas Uggah Embas madahka perambu bekaul kerejasama Komiti Penyangga Penusah Nengeri Sarawak (JPBNS) enggau perintah Sarawak bekena ka vaksin pengalak deka bepun bulan Oktober tu ila.

“Entara pekara ti deka disikap iya nya atur chara klinikal kena bejalaika pengawa nya bekaul bansa vaksin ti deka diberi ngagai mensia mayuh agi mengkang vaksin ti sama tauka enda,” ku iya.

Iya mega madahka opis pengerai meransang raban mudah kena rampit ke beumur 60 tahun ke atas enggau sida ti ngembuan penyakit balat ti bukai tau dulu agi nerima vaksin penguat tubuh tu ila.

Uggah bejaku ngarika Kepala Menteri Sarawak, Datuk Patinggi Abang Johari Tun Abang Haji Openg madahka kitai enda ngenggaika nyema sida ke beumur baruh ari 60 tahun ti gerai mega deka diberi vaksin penguat laban tuju pengawa kitai endang deka ngintu pengerai mensia mayuh.

Nangkan ke nya, Uggah madahka penyampau sida ti tama dalam Unit Sakit Raya (ICU) enggau penyampau orang ti midang ketegal Covid-19 mayuh agi mungkur orang ti udah tuai enggau raban sida ti mudah kena rampit.

Ba aum media tu mega, Uggah madahka perintah nengeri Sarawak deka bekerejasama enggau Serakup Anak Bulan Mirah di semua nengeri bejalaika pengawa meri vaksin ngagai mensia mayuh ti apin nerima dos vaksin keterubah.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak