Udah tanggungpengawa kami mantu rayat

SRI AMAN: Palan Servis Dun Simanggang meri bantu barang pemakai ngagai Rumah Kaunselor Munan, Nanga San enggau Rumah Story @ Julai, Entawa Wong Padong ti benung bejalaika Atur Mindah Betagang Bepekul (PKPD).

Menteri Muda Pengintu Pendiau Raban Bansa Datuk Francis Harden Hollis madahka rumah panjai nya bejalaika PKPD empas ari bisi kes positif Covid-19.

“Endang udah nyadi tanggungpengawa kami meri bantu ari sukut sukung runding enggau bantu pemakai ngagai sida (PKPD).

“Palan Servis Dun Simanggang nengah kerejasama Parti Sa’ati Rakyat Sarawak (SUPP) Pampang Simanggang enggau Biro Orang Indu udah chakah bejalaika pengawa ngagihka bantu ngagai dua buah rumah panjai tu,” ku iya dalam siti penerang media, ensana.

Ku iya, lebuh napi pandemik ti deka berubah nyadi endemik kitai patut udah besedia idup begulai enggau Covid-19.

“Nya alai, ngambi vaksin penuh beguna amat awakka nyema dirampit kitai semina ba Kategori 1 enggau Kategori 2 aja tauka enda balat.

“Diatu kitai meri vaksin ngagai nembiak sekula nyadi terabai tubuh sida sebedau sekula betungga mua dibuka 3 Oktober ti deka datai.

“Aku minta apai indai nembiak meri jaku semangat enggau sukung ngagai bala anak ngulihka vaksin laban nengah chara nya kitai ulih bulih pengering tubuh lebuh dirampit Covid-19,” ku iya.

Ba pengawa nya mega, Adun Simanggang nya bisi nyuaka bantu ngagai rumah panjai Nanga San penyampau RM23,000 ari Sapit Kepala Menteri Datuk Amar Douglas Uggah Embas.

Sama bisi datai Penghulu Mingging Sigan, Cr Denneil Saweng enggau Chairperson Biro Indu SUPP Pampang Simanggang Kapitan Ling Siew Hung.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak