PBB udah bisi rintai chalun ‘disabung’ ungkup PRN

KUCHING: Parti Pesaka Bumiputera Bersatu (PBB) udah bisi rintai nama chalun ke ‘disabung’ ba pengawa bepilih besai nengeri (PRN) tu ila.

Sekretari Besai PBB Datuk Seri Alexander Nanta Linggi taja oia madah, pemutus sekalika udah diputuska tauka bedau nya tepulai ngagai Kepala Menteri Datuk Patinggi Abang Johari Tun Openg.

“Ba PBB endang Kepala Menteri (Abang Johari) udah bisi nama, ungkup komponen (parti) bukai bedau diputuska aku enda nemu,” ku iya.

Iya mansutka pekara nya ngagai pemberita nengah aum pemberita pengudah Pengawa Serumpu Menteri Dagang Dalam Nengeri enggau Pekara Penguna enggau Media, ba sebuah hotel tebilang ditu, kemari.

Nerang silik pasal penyikap Gempung Parti Sarawak (GPS) napi PRN, Nanta madah sida udah sedia kenyau ari taun 2019 suba laban ngumbai PRN ulih diatur taun 2020.

“Taja pia, kitai enda ulih ngatur PRN ba taun nyin kemari beduduk ari pandemik Covid-19,” ujarnya.

Kenu ku Sekretari Besai GPS nya mega, iya udah diasuh Abang Johari kenyau ari taun 2019 suba ngaduka bilik operasyen ungkup PRN mindah kin kitu.

“Bilik nya mega diatu udah berengkah dikena, ungkup ngatur bemacham kus ke diatur sekumbang dua taun tu lalu kereban ke diguna nadai kurang.

“Tikas penyikap diri (PBB) endang udah sedia sebarang maya,” ku iya.

Ungkup penemu, PRN-12 sebedau tu ditangguh beduduk ari pangka pandemik Covid-19 lalu pengawa ulih diatur nganti proklamasi darurat di nengeri tu dipadam kena 2 Februari 2022.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak