Servis ATM udah bisi disediaka ba Gedong

SIMUNJAN: Sepengudah lama napi pemar nadai servis bank, peranak di Dun Gedong diatu ulih ngena servis Mesin Wang Automatik (ATM) ungkup transaksyen wang sereta enda ibuh nurun ke Serian.

Menteri Muda Dagang Entarabansa enggau Industri, Terminal enggau Pemansang Orang Dagang Datuk Mohd Naroden Majais madahka, servis ti disediaka Agrobank di Palan Dagang Gedong nya deka ngeranchakka agi ekonomi ba palan nya.

“Tebal agi kampung ba menua pesisir diatu udah bisi infrastruktur jalai alun ti manah ngaul mengeri, nya alai kitai begunaka ATM dikena ngemuntangka transaksyen peranak ditu.

“Raban Agrobank berengkah nyendiaka minimum RM600,000 seminggu ti mai reti sebulan penyampau RM2.4 juta.

“Aku pan tekenyit tang nya meh utai ti amai. Nya kebuah aku minta ngambika sida ulih nyendiaka sebuah agi mesin ti ulih diguna mindahka enggau nyimpan duit,” ku iya lebuh ditanya Suara Sarawak pengudah Program Ngelancharka ATM Agrobank di Gedong, kilah ensana.

Ku Adun Gedong nya, palan nya ngembuan urung 4,000 iku pekereja menua luar ke tebal agi rayat Indonesia.

“Nya alai, nyau deka ninting bulan sida ngirum duit ngagai menua sida empu. Berebak enggau nya, enti bisi mesin baru ti ngembuan dua bansa servis nya, sida enda ibuh ke Serian agi.

“Tu deka ngeranchakka ekonomi ba Palan Dagang Gedong laban sida deka ngeluar belanja, makai enggau ngirup ditu,” ku iya.

Agrobank nyadi sebuah bank ti ngambi bagi dalam inisiatif Servis Bank Mindah ngagai menua pesisir Sarawak nengah kerejasama perintah nengeri sereta Bank Negara Malaysia.

Enggau ngengkahla sebuah ATM di Gedong ke dipenyadika Sapit Kepala Menteri Datuk Amar Awang Tengah Ali Hasan, dipelabaka pengawa nya deka meri pemaik ngagai 20,000 iku peranak palan besemak.

Servis ATM tu deka dibuka ari pukul 6 pagi nyentuk pukul 10 malam ninting hari seriris enggau timpuh Renggat 3 Pelin Ngemanahka Menua di Sarawak.

Ba program nya mega, pengawa nyuaka replika chek ungkup belanja Skim Kredit Mikro Sarawak (SKMS) mega bisi diberi ngagai peminta ti udah mujur ngulihka bantu ba baruh skim tu.

Ba Dun Gedong, penyampau RM3.8 juta udah dikemendarka enggau udah meri pemaik ngagai 100 iku orang ke minta ungkup tuju mantu orang dagang B40 neruska dagang kelebih agi ti balat kena pangka pengerekai Covid-19.

Program tu mega bisi meri bantu takaful ari Adun Gedong ngagai 152 iku nembiak seranta.

Bantu skim Takaful Kasih Plus enggau Agro Nurani tu meri pemaik ngagai penerima nengah lindung takaful penyampau RM1,693,000.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak