144 indai tunggal di Miri nerima bantu pemakai

MIRI: Sepenyampau 144 iku indai tunggal nerima bantu pemakai ari Kelab Rama enggau Pengintu Pengelantang Miri, ditu ensana.

Bantu nya udah dikemujur Menteri Perengka Pengangkut ke mega Adun Senadin Datuk Lee Kim Shin.

Lebuh bejaku, Kim Shin meri terima kasih ngagai Chairman Kelab Rama enggau Pengintu Pendiau Miri, Connie Tang laban udah nganjung bantu nya ninting taun.

“Kelab tu udah mayuh mantu indai tunggal ari sukut nyaga pengelantang enggau pelajar anak sida.

“Aku ngarapka bala nembiak ke nerima bantu ari kelab nya deka mantu komuniti bukai dudi hari,” terang iya.

Bantu khas mega disua ngagai Leong Lee Chin ke deka nampung pelajar ba Unimas, Kota Samarahan.

Ba pengawa nya, genap indai tunggal nerima bantu pemakai baka minyak M=makai, telu, berau, mi, sengkabung mua enggau ke bukai.

Ba sebengkah agi endur, Kim Shin nerima bantu kereban berubat Covid-19 ari raban LAKU Management Sdn Bhd betuaika Tuai Pegawai Eksekutif iya, Ts. Daneil Punang.

Sama datai Residen Miri, Abdul Aziz Mohamad Yusuf, Pegawai Opis Pengerai Bagi Menua Miri, Dr P. Raviwharmman A/L Packierisamy, Tuai Sektor Pemansang Pengerai Ruang Bilik, Dr Noor Izni Mohamed Shapie sereta bala bukai.

Suara Sarawak